حلول اللغز ,,حلول اللغز ,,حلول اللغز ,,حلول اللغز ,,حلول اللغز

نشرنا في عدد الجمعة الماضية لغزا كتبه الشاعر الكبير مستور العصيمي,, وكان حله قصر المصمك أو بصورة أدق باب قصر المصمك وقد جاءتنا عشرات الحلول فاخترنا منها ما اكتملت فيه شروط النشر وهي كما يلي:
في صفحة التراث يوم إني أقرا
قريت لغز عذب مبني على ساس
لغز العصيمي له مكانه وقدرا
نفخر بها حنا على كل الاجناس
الباب والشلفا,, وللغز ذكرى
يوم الوطن لايامنا الغر نبراس
ثامر القطيم السبيعي
رماح
***************
لا هنت يامن تصخر القاف صخرى
تصرف ذهب للناس ما تصرف نحاس
الرجل باب القصر والعارف أدرى
والبنت شلفا الشيخ ياطيب الساس
شلفا زعيماً له معزة وقدرا
عند الرجال لهم فكر وإحساس
علي الحصني
الرياض
***************
أهلاً عدد ما ناض برق بغدرا
واعداد ما تجري بالاجسام الانفاس
ياشاعرٍ باللعب يكتب ويقرا
عز الله إن لغزك بنيته على ساس
الباب والشلفا معزة وفخرا
تاريخ يقرونه على صفح قرطاس
ناصر المسيميري
الرس
***************
يامرحبا بك زود عزٍ وقدرا
غالي ولك في قمة الشعر مجلاس
قولك الياغنيت,, بالمال يشرا
يامنور الصفحة,, لك أسلوب واحساس
وشلفا فهد صارت على الباب ذكرى
في مدخل المصمك لها وزن وقياس
فهد الجروان
الزلفي
***************
لغزٍ حبكته سر من كان يقرا
فالصفحة اللي فازت بكل مقياس
مستور حل اللغز عندي وأنا أدرى
شلفا زرقها الشيخ والناس غطاس
حربه بباب القصر والناس تدرا
زرقة شجاعٍ عقبها صار نوماس
فهد المحمد السماعيل
أشيقر
***************
يقول من هو لاهل العرف يدرا
حييت يامستور ياطيب الساس
الباب له تاريخ مكتوب يقرا
وشلفا قوي العزم مع قوة الباس
وأنا أحمد اللي بدل العسر يسرا
واللغز حله جاك من عند حواس
حواس الديري
قبه
***************
مستور بن تركي عن العيب يبرى
رجلٍ علم,, في قمة المجد له ساس
لغزه عزيز,, وله مكانه وقدرا
وحبالوطن بقلوبنا ماله قياس
والباب به حرفٍ لمن كان يقرا
باب القصر شلفا فهد فيه نبراس
محمد المويعزي
بريدة
***************
يوم العصيمي صاغ الالغاز ما أزرى
يصوغها صوغ الجنيهات والماس
الرجل باب القصر مغلق بمجرى
والبنت شلفا الشيخ حماي الأفراس
مية سنه مرت للأجيال ذكرى
ذكرى الهجاد اللي تسولف به الناس
ضيف الله ماطر الثبيتي
الرياض
***************
دوك الجزيرة ريح النفس واقرا
ترى الهموم جروحها مثل الامواس
لغزٍ جمع معناه قيمه وقدرا
لغز العصيمي طيب الخال والساس
في ساعه ياناس ماهيب قشرا
فتح الرياض وصارت الحربه الساس
محمد بن عبدالله الغزي
الزلفي
***************
في صفحة تراث الجزيرة وأنا أقرا
لمحت لي لغز كما الدر والماس
اللغز واضح عندنا وأنته أدرى
يجيك حل اللغز في ظهر قرطاس
هذا هوالمصمك ماهو قصر كسرى
مبني بوسط العاصمة جيد الساس
بندر بن عبدالله آل مانع العقيلي
***************
لغزاً قريته بالجزيرة ويقرا
من شاعر مشهور بالشعر حساس
مستور جاب اللغز في لغزه ادرى
وأنا كتبت الحل في طلع قرطاس
المصمك اللي فيه شلفا ومجرى
أنا أشهد ان القصر مبني على ساس
خالد المويهان الشعبي
بريدة
***************
سلام مني مع تحية وقدرا
للشاعر اللي جاب لغز على ساس
باب الحصن واحياه صقر وحرا
بشلفا على الباغي بها قطف الانفاس
من حنكته ذاق العدو كاس مرا
وفتح بلاد الخير مع قوة الباس
محمد بن عبدالعزيز الخنيفر
أشيقر
***************
كتبت يامستور والناس تقرا
يااللي خذيت الدرع بالرد والكاس
ماشوف لك ياجاحد الحق عنها
المملكة بالأمن للناس مقياس
أمن ورخا وامان والارض خضرا
والباب به شلفا ولا عاد ينداس
محمد عبدالكريم الغزي
الزلفي
***************
سلام يامستور يانور بدرا
عداد ماحبر انكتب فوق قرطاس
لغزك نظمته در للنصر ذكرى
شاهد عليه الباب والحد مغراس
سطر على التاريخ من نور سطرا
تكسب به الأجيال علم ونوماس
محمد بن حميد الشيخ
***************
ياشاعر في ساحة الشعر أثرى
سلام رده عد ماهب نسناس
موجود حتى اليوم فالقصر ذكرى
حربه نشبت فالباب من قوة الباس
عسى يروق الحل وينال نشرا
شعراً بذل راعيه دقه وإحساس
علي بن مسعد السناني
***************
ألف وثلاثمية وتسعٍ وعشرا
جاك البطل متعرضٍ حمر الأطعاس
خلى على المصمك عجاجٍ وغبرا
نهارٍ كثر فيه طايح ومحتاس
والبنت شلفا للمعادين تفرا
تفرا الجسد وتطير الساس والراس
راشد محسن آل مسرع
وادي الدواسر
***************
مستور شاعر في سما الشعر بدرا
ينظم عقود المعرفة نظم الألماس
عبّر عن التاريخ في جوف قصرا
شاهد لفعل رجال في شدة الباس
حربه بوسط الباب مفتاح نصرا
عم البلاد بنور للحين نبراس
عبدالرحمن بن مرشود العلواني
***************
قصر الرياض يجاوبه قصر شبرا
قال الرجل بابك وشلفاه نوماس
شلفا الإمام اللي هجد ليل غدرى
وضرب بها ضربة شجيع قوي باس
ميه سنة في الباب تكتب وتقرا
عن مجد أبو تركي تسولف مع الناس
فهد القثامي
الخبر
***************
الأوله يا مرحبا بك والأخرى
فتح الرياض بسطر الأمجاد نوماس
هجاد ليل وفيه نصر وبشرى
صقر الجزيرة عاد والحكم له ساس
والشاهد الشلفا على الباب ذكرى
ضربه شجاع يهتوي قطع الارماس
عطا الله بن سليمان العطا الله
الزلفي
***************
لغزٍ نشر في صفحة المجد يقرا
من شاعرٍ قاله على فكر واحساس
اللغز يامستور يعرف ويدرى
الرجل باب المصمك بكل الأقياس
والبنت شلفا من حكم نجد جهرا
عبدالعزيز اللي له الطيب نوماس
شداد عليان المطيري
حائل
***************
مستور جاب اللغز في وقت ذكرى
ذكرى عزيزة ياملا ترفع الراس
وترى الرفيق اللي حمل له بعذرى
باب بقصر الحكم للشعب نبراس
ومن قبل ذاك اليوم كنا بغدرى
واليوم شفنا الخير مع كل نسناس
هندي بن نابت الغيثات
الأفلاج
***************
مستور جاب اللغز وبحله أدرى
شاعر واديب وله مع الشعر مرواس
واللغز عنه الناس تكتب وتقرا
لو كان ما يحتاج حبرٍ وقرطاس
المصمك اللي له مكانه وقدرا
والبنت شلفاً رزها طيب الساس
شبيب بن شاهر السبيعي
***************
حنا نعيش اليوم باعز ذكرى
ولغز الوطن من شاعرٍ ياخذ الكاس
اللغز له معنى وقيمه وقدرا
فعل الزعيم اللي كسب كل نوماس
شلفاه بالمصمك لها فيه مجدا
ادب بها اللي صار في خشمه عطاس
باني فايز السبيعي
الأحساء
***************
يا مرحبا بك عد ما كان يقرا
شعراً تربع بين ريشه وقرطاس
لغز العصيمي يسمر القلب سمرا
مثايلٍ يابو حمد ترفع الراس
كنه على بيض الورق نور قمرا
المصمك اللي فيه للمجد مقياس
خليف الحربي
الرياض
***************
الغز له يا اهل المواجيب قدرا
من شاعرٍ في غبة الشعر غطاس
لكن يا مستور ما فيه عسرى
لقلبٍ فطين وكل شي له قياس
بابٍ حمل شلفا إلى اليوم ذكرى
من كف رجلٍ ما يعود بالافلاس
تركي بن سفر العتيبي
الدوادمي
***************
مستور من لغزه أنا أقول حذرا
عرفه يخلي كامل العرف منحاس
هذا جوابه حيث ما عنه عذرا
عبر التراث يجيه حبرٍ بقرطاس
في خوخة المصمك وللمجد مذرا
الحربه اللي شوفها يرفع الراس
فهد بن عقيل الطويان
بريدة
***************
في ليلة فيها النواميس تشرى
بأرواح قومٍ ذكرهم يرفع الراس
نادى مناديها الضحى قال بشرى
بعبد العزيز اليعربي طيب الساس
شلفاه بنحور المناعير تفرى
شفنا بقاياها على الباب دراس
صويلح بن عبيسان الشيباني