ابرّ واغلا ما تحلّت به العين

ياللي ورى ركنك تلوذ المساكين
واسجد لمرضاتك واذلل جبيني
عبدك على عهدك ومدك بلا حين
وأنا على بابك وتعلم كنيني
أزريت لا أعدل كفوف الموازين
وازريت أسد الربع من عشر ديني
لبيه ثم لبيه لبيه واهلين
ياعز وجهين وثمرها سنيني
وابر وأغلا ما تحلت به العين
واجل وابرك من اجيه ويجيني
واهلاً ولو اهلاً توقف مع اسمين
وقفتها ما بين الأسمى وبيني
واثنين ما افرق فالغلا ومتساوين
الأني افرق بين عيني وعيني
ليت انهم فالصدر حرز عن البين
والموت قبل يمرهم يحتويني
وعن واهج الرمضا ضلوعي بساتين
واليا وطوها زلهم راحتيني
اطيب وامرض واغضب العمر وازين
وانسى المجافي واجفى اللي يبيني
واحب واكره واحشم انسان واهين
في ذاتهم واقرب بهم مبعديني
واصل على رجوى رضاهم للقصين
واقطع بمبعدهم ولوه يميني
ولو ان عمري يصرف ايام واسنين
قسمت عمري عدل مع غالييني
واليا نزلت اقبل اكفوفهم لين
ساويت راسي مطلع الفرقديني
وأنا فدا ما طى قدم جل الاثنين
من دون اقول اللي تحوشه يديني
وأمين من جودك ومن جودك أمين
يالله عسى الجنة جزا والديني
- خالد محمد العتيبي