رد اعتباري

دام هذا الدرب جيته باختياري=ليش الوم الوقت وأستسخف سنيني
كلما سجيت تطريلي طواري=ولا تنبهتك وإلاك تعيش فيني
بس ليتك عاد تشعر بانكساري=يوم باحت دمعتيني في كنيني
يوم ضاقت فيّ هليت العباري=ويوم هلت طاح عمري من يديني
بس احيانا أنا أشعر بانتصاري=كلما ضقت وتملت فيك عيني
صاحبي مليت من طول انتظاري=والعمر بالموت الأحمر منتويني
لليال السود في وجهي مواري=سرمدياتٍ تعلم في جبيني
صاحبي الوقت لي والدار داري=كيف تتجرأ هالألسن وتحكيني
ليش تثعا بالخناجر في نهاري=ليش تدميني وهي بيني وبيني
جيتك بإحساس ماهوب استعاري=فاقده هالعمر وأغلا والديني
جيتك بتكفا من سنين العزاري=جيت تكفا من عنا العمر تحميني
جيت أبشكيلك وأبي رد اعتباري=من سنينٍ للغرابيل تحديني
للطعون الحمر في صدري شواري=ماتوسد فالليال إلا ونيني
صاحبي اسرفت شكوا واعتذاري=وأقصر الموضوع ذا في كلمتيني
والله إني فيك أشعر بانتصاري=كلما ضقت وتملت فيك عيني