حلول اللغز

نشرنا في عدد الأسبوع الماضي لغزاً كتبه الشاعر علي بن رشيد الرشيد وكان نصه:
أنشدك عن بنتين ما بينهن فرق
قدم أمهن وحده ووحده وراها
لاغربت وحده تصير اختها شرق
ووجيهن ما يختلف محتواها
وقد وصلتنا عشرات الحلول اخترنا منها ما اكتملت فيه شروط النشر فجاءت كما يلي:
يا محلا شوف المغاتير يا برق
في خايعٍ والعشب يكسي عراها
الحل لوحة والمواتر بها فرق
والبنز تفرق واهني من شراها
محمد الشايع بريدة
سيارتك لا من مشت تقطع الطرق
جديدة ربي يسهل عليها
مجددة لوحاتها لونها زرق
قدم تجي لوحة والأخرى وراها
حسين محمد الكبرى الأفلاج
في صفحة تلمع كما يلمع البرق
أهلاً بمن شارك بها أو قراها
ويابن رشيد البيض والحمر والزرق
«لوحات» يوم انا بحثنا خفاها
عطا الله بن سليمان العطاالله الزلفي
يا مرحبا بك عد ما لاح من برق
وعداد سحب نثرت كل ماها
وسيارتك لوحاتها ما بهن فرق
قدم أمها وحده والأخرى وراها
سعود بن جازي الحربي الرياض
لغز الجزيرة واضحٍ كنّه البرق
أوضح من القمراء بصافي سماها
الفكس يزرق جابتي عندكم زرق
يمشي بلا «لوحه» وياخذ جزاها
خالد بن سليمان الجريش
سلام مني عد ما يلمع البرق
وعداد ما تذري نسايم هواها
ولغز الفهيم للي على مصعب الطرق
لوحات ياللي جاهلاً بمعناها
الحميدي شخير العنزي بريدة
قريت لغزٍ طارقه صاحبه طرق
أحسن بيوت اللغز يومه بناها
يا علي حل اللغز ما نسرقه سرق
لوحات موتركم جوابه تراها
محمد بن ناصر العريني رياض الخبراء
سيارتك قدام تعبر بها الطرق
احرص على اللوحات دايم معاها
واقبل تحيه عد ما يبرق البرق
ياللي بيوتك طيبه بمعناها
زهران عون الله المطيري بريدة
أهلا هلا بك عد ما لاح من برق
وأعداد همال المطر من سماها
وابعث جواب اللغز باللحن والطرق
لوحات سيارة ما تمشي بلاها
علي غنام الغنام رياض الخبراء
يا مسافر في رحلتك وجهة الشرق
افحص على سيارتك شوف ماها
سيارتك لوحاتها ما بهن فرق
أمامها وحده والأخرى وراها
معجب مطلق الشكره الأفلاج
وجه السحابه يا علي يبتسم برق
واليا أمر رب السماء هل ماها
والفرق بين الحمر والبيض والزرق
عند المرور وكل لوحة تباها
محمد عبدالكريم الغزي الزلفي
يا مرحبا مالاح في غيمةٍ برق
ببيوت شعر راقي مستواها
واللغز حله لوحتينٍ بلا فرق
في مقدم المركبه والأخرى وراها
دخيل الله ناصر البدراني الدمام
يامرحباً اعداد ما ناض من برق
بالشاعر اللي صفحته ما نساها
سيارك لوحاتها لونها زرق
لوحاتها ما يختلف محتواها
محمد آل ظافر الأفلاج الحدود
اللغر حله واضحٍ كنه البرق
كل العقول الواعية ما خفاها
موترك لوحاته ترى ما بها فرق
حطيتها قدام والا وراها
دغيم بن فهيد الخمشي الأسياح
يا مرحباً اعداد ما يبرق البرق
با اللي تفاكيره بعيداً مداها
هذه هي اللوحات خوفاً من السرق
يا الله عسى السرقان يقطع رجاها
محسن مبارك العرجاني الأفلاج النايفية
سلام لابن رشيد ما يَلْعَج البرق
واعداد نوٍّ هل واسقى ثراها
خذ يا علي حلِّي على موجب الطرق
لوحات سيارة اتربَّط معاها
منصور بن عبدالله المجيدل الرس
ما هبت النسمة.. وما ناحت الورق
حييت.. والصفحة اتسابق خطاها
بانجازها.. وابداعها تسبق البرق
واللوحة أم أرقام ما به سواها
فهد الجروان الزلفي
يا مرحباً اعداد ما غرد الورق
بصحابنا اللي ما نزل مستواها
حافظ على اللوحة ترى فيه أمن طرق
وان كان طاحت منك تاخذ جزاها