سلطان قبره ما يواريه عنّا

وهذا الشعور اللي يكدّر صفانا
يا أهل الوطن ما جت على ما انتمنّا
مات الكريم ولا تحقّق رجانا
ابكوا ترى حنّا هلَ الصدق حنّا
إن ما بكينا شيخنا وش بلانا
خلّوا دموع العين منّا ومنّا
كود الدموع تخفّف اللي دهانا
سلطان غاب وغيّب الضحك منّا
من راح عنّا والكرى ما هنانا
نشعر برمح ٍ بالمحاني طعنّا
ونشعر بلون أسود يغطّي سمانا
بصدورنا هم ٍبيوته تبنّا
وبوجيهنا حزن يترجم غلانا
مات الحكيم اللي بعطفه حضنّا
مات الحليم اللي بطيبه رعانا
فقده مرير ومن بلاوي زمنّا
وحملٍ ثقيلٍ ما تشيله عضانا
سلطان قبره ما يواريه عنّا
بقلوبنا ساكن وعايش معانا
سوّى سوايا الخيّرين وسكنّا
فضايله شابت عليها لحانا
يا خادم البيتين لا.. لا تعنّا
شوفتك واقف زوّدت من عنانا
ما يلحقك في حب سلطان ظنّا
اِرتح ترانا وافرينك ترانا
الله يحفظك يا زبون المجنّا
ولله في سلطان يجبر عزانا
يا رب ساعد وارحم اللي دفنّا
واِلطف بنا يا رب واِقبل دعانا
عبدالله مقعد العتيبي