من كثر حبّك كثروا اللي يواسون

والشارع اللي من تواليه مليان
واللي يجون اكثر من اللي يروحون
اسرة وفا واحباب واخوان واعوان
حزنت قلوب واجدٍ وهلّت عيون
وقليل لو هلت بدمع الاعيان
والعين ما تاقع على غير محزون
وغطى البيوت الحزن باشكال والوان
من كثر حبك كثروا اللي يواسون
وما ينتكاثر حب الامير سلمان
لو طالت ايام العزا شفت وش لون
تاصل طوابير العزا حد بنبان
مانيب ابالغ كل ما قلت موزون
والعاطفة والعقل عندي بميزان
يا بو فهد عندك فهود يعوضون
ولله حكمه يوم ياخذ كحيلان
وافي وكل اشبالك بحق يافون
والموت ما لاحد عليه اي سلطان
وما مات من له نقوة الناس يطرون
وما غير يذكر بالمبرة والاحسان
والصبر ينفع والحبايب يسلون
والصبر منتوجه ثواب وسلوان
وانت الخبير بحالة الكود والهون
وانت الحكيم وراس ذربين الايمان
واللي رعوا خايع نباته يلدون
يم السحاب ويم هاذيك الامزان
متعودين منه هتان ومزون
ما تنقطع واضمن عليها بالايمان
باخوانه اللي من مناهلك يروون
متعلمين منك يا طير حوران
هذا عزايه والقدر غير مامون
والعيش بين افراح مرات واحزان
وفي الختم اقول وكل ربعي يقولون
يالله تحفظ عالي الشان سلمان
ابراهيم بن عبدالرحمن بن حمد المفدى
الرياض - اشيقر