أبكيتنا

وعلمتنا وشلون الإخوان يوفون
عامين وأنت ملازمه وين ما كان
هو فيه أخو مثلك على ظاهر الكون
الحزن كل الحزن في وجه سلمان
شفته وزاد الحزن في قلب محزون
تجمعوا حوله محبين وأخوان
وشالوه قدم اللي لفوهم يعزون
على مطار القاعدة جاه مرضان
واستقبله ما قال عني يسدّون
أخوٍ حمل قلبه من الطيبة إنسان
ملك وخادم بيت من له يلبون
في ماقف يوقف شعر بعض الأبدان
محدٍ يصدّق كيف الإخوان هاللون
عصى طبيبه والتَّعب يرسم ألوان
على محيا هامته جاه مديون
يا من يلوم الناس في حب سلطان
الشعب كله في ضحى السبت يبكون
ولي عهد المملكة طير حوران
أبو اليتامى من بعده بيضيعون
أكرم كريم وفي عطاياه صفطان
وإن جاه راعي حاجةٍ كان له عون
كم من مريضٍ عالجه دون نقصان
لونَّ علاجه كل يومٍ بمليون
عطاه لو يوزن وغيره بميزان
رجح عطاه لو قالوا الناس يعطون
رأيه حكيم ليا رقص كل شيطان
كم معضلٍ حله بحنكته وقانون
على جنوده قبَّل الراس سلطان
تواضع في ماقف يبكي عيون
جاهم وهو من نايد البعد تعبان
رغم المرض يزورهم لو يعذرون
حتى المعاق اللي عرف فضل الإحسان
على فراقه سطََّر الشِّعر موزون
يرثيه دمع وقطَّع القلب حزنان
ودَّه عليه القبر قبله يهيلون
يالله بغيث من مراويح الأمزان
يسقي ثرا قبرٍ ورى العود مدفون
ينبت على جاله من النبت بستان
يا مر العزيز اللي له الناس يدعون
يا ليت لو الموت يفدى عن إنسان
يا كثر ناسٍ له عن الموت يفدون
يا رب عنه اعفو ونزَّله بجنان
اقبل دعانا والرجاء فيك مقرون
سعود المسعودي