حلول اللغز

نشرنا في عدد الجمعة الماضي لغزاً كتبه الشاعر فهد محمد الحزاب من محافظة الرس وكان نصه:
انشدك عن حبل طويل وممدود
مايلزمه ياكود قرم الرجاجيل
الحبل معروفٍ ولاهوب موجود
يذكر ولاينشاف باقوى الدرابيل
وقد جاءت الحلول الصحيحة كما يلي:
حبل الرجا والوصل ثابت ومشدود
وحبل الرجا بالله قوي يامشاكيل
المرجله باصحابها تطلب الزود
وانتم اهلها ياهل الجود والهيل
محمد علي السالمي
رفحاء
***
المرجله عسره على كل مقرود
وماطالها نقالة القال والقيل
المرجله حصلتها مع هل الجود
نطاحة الواجب وذباحة الحيل
محمد بن معتق بن صخيبر الغرابي
عنيزة
***
لغز لفانا حير الفكر بردود
من كف قرم صايغة للتعاليل
حبل المراجل دايم الدوم مشدود
ولايرتخي حبل تشده رجاجيل
عبدالله سليمان مهدي العطوي
تبوك
***
واضح سؤالك يافهد منبع الجود
عندي ولا يحتاج شرح وتفاصيل
حبل المراجل مايجي دون مجهود
وقد قاله الشاعر حسين التماثيل
محمد هذال ال بريك
الرياض
***
بديت باسم اللي له العالم اسجود
اللي نصر جنده وهزم هل الفيل
اللغز حله يافتى الجود موجود
المرجله مايدركونه مهازيل
المال له دورٍ لمن يبذل الجود
والى اجتمع هذا وهذا وفا الكيل
دخيل فضي الشملاني العنزي
الرياض
***
يامرحبا نصف التراحيب بالعود
والنصف الآخر في نظاف الفناجيل
يابو محمد ماعلى لغزكم زود
الطيب في صدور الرياجيل بالحيل
مناحي مطلق العتيبي
عرجاء
***
يامرحبا بك عد ماذعذع النود
وعداد ماتمطر علينا هماليل
وللغز حله حل واحد ومفرود
المرجله مابه جدال وتحاليل
فليح بن عايض
الخرج
***
يامرحبا ترحيبة تطلب الزود
بك يافهد من يوم جيت التماثيل
ولغزك لحبل المرجله صار مقصود
والله يوفقنا لدرب التساهيل
عطا الله بن سليمان العطا الله
الزلفي
***
يامرحبا عداد مايخضر العود
واعداد ماهلت عليه الهماليل
واللغز حله واضح يافتى الجود
المرجله عنوان قرم الرجاجيل
سفر مشبب الشطيطي
العمار
***
ياهل الوفا والجود والهيل والعود
والمجلس اللي مدهلٍ للمشاكيل
اللي يعرف البيض يدري عن السود
حبل المراجل مابعد شافه بخيل
محمد عبدالكريم الغزي
الزلفي
***
ياللي على درب الوفا تدفع الذود
حييت ماخن ازرق العود والهيل
يابو محمد لا انقص الهرج ولا ازود
حبل المراجل لبسوه الاكاليل
عبدالرحمن الجروان
الزلفي
***
يامرحبا بك عدما هبت النود
واعداد برقٍ في مقادم مجاييل
اللغز حله يابن الاجواد ماجود
الطيب بفعول الرجال الحلاحيل
خليف الحربي
الرياض
***
درب العطا ماله نهايات وحدود
لا لا,, ولا له في زمنا مكاييل
تكفون يارجال الوفا,, يا هل الجود
حبل المراجل لايجي به تباديل
محمد عبدالله البهلال
بقيق
***
عد السحاب,, وعد ماحنت رعود
حي الله اللي لابدا يوفي الكيل
للمرجلة حبل يابو حزاب مجرود
صحيح لامن مس ياصل ورا سهيل
فهد الجروان