عمرك مطيّه

أنا البارحة يوم إن خالي الضماير بات=تسلّطّ على عيني حريبٍ يحاربها
حرمها لذيذ النوم والنوم له لذات=ليا حل في العينين فتّرحواجبها
سرت بي ركايب هاجسي في زمانٍ فات=وكم من هواجيسٍ تتعّب ركايبها
أراجع كتاب العمر واقلّب الصفحات=وصفحة مزيّنها وصفحة مخربها
وياكثر مافيها صور ناس وحكايات=صورناس وحكايات وأشعار كاتبها
زمان الصبا يوم الهوى طيّب النسمات=ليا داعب الأنفاس ريحة يطيبها
بربح الزهور اللي لها بالهوى ميلات=ليا هبت انسام العصاري تجاذبها
وانا مثل طير الروض لاطابت الأوقات=يطارد فراشات الزهور ويلاعبها
وروح الصبا غضه طريه لها فزات=خدمها صحيح الجسم والجهل صاحبها
وما تدري إن العمر يمضي وله ساعات=سوالف ربيعه في خريفه يكذبها
هوى النفس يدفعها ويظهر لها الرغبات=وكم رغبةٍ كانت وخيمة عواقبها
ولابد ماتصحى من الجهل والغفلات=ليا شابت اللحية وشابت شواربها
وماتت زهور الروض واوراقه الغضات=وقبّل على الأغصان حطاب يحطبها
لوإن المطر همّال مايحيي اللي مات=تشوف السيول تسيل والرمل يشربها
ليا اقفى ربيع العمر قفّت معه حاجات=بعدها تلد العين وش عاد يعجبها
رسوم الديار البالية مابها طمعات=ليا اقفى الربيع وصالي القيض يلهبها
وعمرك مطيه عودت تسرع الخطوات=بعد ما اونست جرح المسامه بغاربها
نوت تنهي الرحلة وتخلص من الحملات=وترتاح من هذي المسامه وراكبها
نصيبك من الدنيا رصيدٍ من الحسرات=وهذي هي الأيام وانا مجربها
ولابدى مشرق شمسها يخلف الهقوات=ولابد مشرقها يعوّد لمغربها