الموعد

هنا والبرد شق العظم جلاده=وقفت استعطفك واستعطفك وأرجيك
تجي وتسلم الخفاق لأعياده=وتاخذني على شاطي الهنا بيديك
ذبل غصن انتظاري والوله زاده=وقلبي لو على كيفه رحل يأتيك
زعل مني وقال بذمتك ناده=وأنا خايف أحقق رغبته وأدعيك
أخاف يطول صوتي سمع صياده =وأسبب مشكله قبل أبتدي وأنهيك
ورجعت أشف قهوة وعدك الساده=وأقول من التعب ياربي أنت أشفيك؟!
أخاف انك سرقت الوقت ميعاده=وأخاف ان الجفاء مع قسوته مرضيك
وأخاف انك نسيت الوعد وأسياده=وأخاف انك غفيت وقلت مايمديك
وأخاف أخاف منك أخاف بزياده=يكون الوضع عادي أو مايعنيك
غريبه لهفتك ماهي على العاده!=وأنا اللي خابرك ينسى أولك تاليك
تجي وتصحي الشارع من أرقاده=وتستانسبك الأبواب والبوتيك
ويشرق هالمكان وكن رواده=ماغير أنت . وزمنك أنت . وخطى رجليك
تحرك ساكنه وتبعثر أوتاده=وهو يجمعك شوق ولهفه ويبنيك
تجي وتصحي العصفور لانشاده=ويكتشفك لحن مفقود ويغنيك
وأجيك أشيل جرح الشوق لاضماده =وأحس انك تقول الحين كيف أشفيك؟
وأصبحك بندى صبحي وريناده=وأغيضبك العطور وتنعشه ويشيك
وأحس الوقت معك يخون عداده=ويستعجل ويستعجلك ويوديك
وترحل واحتسي من عطرك وساده=بكفي لجل أنام بصحوتي واحكيك
واغمض وأتخيل طيفك قلاده=على صدري واعود اتخيلك وأبكيك
واحس بلذة الموعد وميلاده=واحس بلذة فراقك عشان أجيك
وشف هاليوم منت اللي على العاده =قضى صبري وانا اتحراك وأسترجيك
وحتى قلبي اللي خانت أعياده=يقول أدعه وأنا من جد كيف أدعيك؟