ذكريات الشوق

يابحر ياكثر سمارك وسرك دفين
فى اعماقك اللي مثل قلبي على ماحوى
اجيك وانا عرفك يابحر مالك خدين
اغريتنى فى هدوك لين موجك عوى
تجيبنى ذكريات الشوق لك والحنين
قلطتنى ضيف وانا ضيف بحر الهوى
عجزت لا اقاوم امواجه وجنبي متين
يابحر خارت على شاطيه كل القوى
سبحان من سخرك تجرى عليك السفين
رغم ملوحتك كل اللي يجيك ارتوى
واسباب ملحك دموع ضيوفك العاشقين
كم عاشق لااشتهى يبكى لحضنك ضوى
فضفضت لانفاسك اسراري وانا لك مدين
كنت التجي لك واحس انك لهمى دوى
وتهدينى الشعر وانا اهديك در ثمين
ورويت سري لمحارك وعنى روى
ماقلت لك خلها بينى وبينك لحين
نجيك فى الموعد اللي تنتظرنا سوى
مليت من وحدتى جنبك وقلبي حزين
ياليتنى كنت بالواد المقدس طوى
واليوم يابحر سجلنى مع الراحلين
وان قلت يابحر عود قلت مالك لوى