قصيدة للشاعر مصلح بن عياد

يالله إلي بأمرك النور شعشاع
يادامج الزلات ياقاضي الدين
يارب تغفر زلة مالها سناع
عليه اثقل من جبال الامرين
يوم اتذكرها وانا لازم القاع
اقوم وادرج راسي يسار ويمين
تقول لاهبني على الكبد منزاع
وإلا مصوبني على القلب سكين
عزالله إني من عنا الرب مرتاع
والنفس تجهدني على الزين والشين
يالله عساني في مطوعتك مطواع
يارب ساعدني على القلب والعين
المرجلة ياهل المراجل لها انواع
ثلاث واربع يانشاما وثنتين
خوف من الله واحترام وتشفاع
وحفط على رزق اليتاما والمساكين
وبرالثنين اللي خذو عنك الاوجاع
وسهروا على شانك من الليل ثلثين
شجاعة ماهي شجاعة تفيراع
لاولع الشيطان نار الشياطين
راس القريب مالها فيه مشلاع
على العدا ماهي على الربع الادنين
وصينية يلقابها الضيف مرباع
ولاهزعوا جيلانها بام عصبين
وبرية تشرى من السوق وتباع
وسوالف زينة من الخاطر الزين
والصبر والحكمة وزينات الاطباع
وامقابل الديان في حزة الدين
وحاذرور من كثر الغضب والتجزاع
عند المصايب واختلاف القوانين
وليا بدالك صاحبن فيك طماع
خله يسار الدرب وانته رح يمين
واجزع طريقت للرياجيل مجزاع
وخل الدناوه للرجال الدنيين
لاصار شورك ما يسبعك سباع
مالوا عليك مرجحين الموازين
ليا صار مانته لازرق الجم شراع
خله لسباح يجنب عن الطين
والحذفه اللي مالها فيك ميقاع
تعدها ولا تسبر الحذف من وين
واليا اعترض لك حذفة توجع وجاع
رد السلف لمدور الصاع صاعين
رد ن على بعض الرياجيل في ساع
اخير من بكرة وبعدينه وبعدين
من عاد يقضي لك لزومك ليا ضاع
واعجل ليا شفت الرياجيل عجلين
وان زلت الفرصة توقع توقاع
ولا تقضي قرش غدالك بقرشين
لياصار ماهي لايمة فاقصر الباع
واخذ الدليل ليا اقنعوك الذويين
طرد ورا المقفي بعرضك الارواع
وكثر السناوي ما تملي مواعين
للخير تباع وللشر تباع
وحاذور تنعس والرياجيل واعين
والذيب مايرقد هني ليا جاع
غصب على الراعي يحوي على الضين
وصلاة ربي عد ماهب ذعذاع
على رسول الطيبين الموامين