ساير ظروف الوقت واسبح بيمه

ياقاف حضر طالبك في مهمه
تعال وقع لي على صفحة البوك
طير الهجوس الشرد ودي بخمه
أخاف يجفاني ليا صار مفكوك
بعض الدروس الواضحه والمهمه
عرفتها من كثر ما مشي على الشوك
لا خطيت فالتقدير جبت المطمه
ول ارخيت جنبك للرياجيل حدوك
وفعلك ليا من قلت لازم تتمه
والا ترا هرجك مع الوقت متروك
وشمل الرفيق ان كان تقدر تلمه
لمه وخله في عيونك وانا اخوك
ما كل عدٍ حلو يروي مجمه
ولا كل مشروكٍ على طول مبروك
شد الحزام وخل همتك همه
ان كان تبغى قولة ونعم لاطروك
الخط ماشي والفضا مدلهمه
والمعمعه من خلفها باب مصكوك
تخالف الهقوه على كل يمه
وتلقى الطريق بجرة الخلق مدكوك
احد مدح بالوقت واحدٍ يذمه
ما يدري ان الوقت ماهوب مملوك
ساير ظروف الوقت واسبح بيمه
ما فيه ضيق الا بالافراج مشروك
واللي شرب بيديه كاسات سمه
يلقى النهايه ما بها ريب وشكوك