دراسة «فهلوية»!

يعجبني الصحفي الفهلوي.. بس ذاك اللي ما يزود الفهلوة ثم يصك بالسقف.. بعض الصحفيين يعتمد على الفهلوة ويطلع صحيح.. ويكسب سبق صحفي.. وبعضهم يضربها عميا وتجي مفتحة.. بس بعض الفهلوة ما ودك إن الواحد يكتبها بجريدته.. قال وش ذلك على الكذبة؟ قال كبرها.. يقول الخبر اللي يهول العقل من كبره.. إن السعوديين يصرفون على الشحاذين 700 مليون ريال سعودي.. ومن زود القوة البحثية بالموضوع كمان محدد لك كم ياخذ كل شحاذ 1333 شوفوا الرقم، ورصدوا رصد جامد وقوي للشحاذين ولقوا عددهم 150 ألف متسول.. فديت الدراسات الصدقية اللي ما تمزح.. يا جماعة.. وربي حرام اللي يسووه بعض الناس.. مرة وحدة قدرنا نحسب عدد الشحاذين.. لا.. وقدرنا نحسب كم نصرف عليهم.. وش هالأجهزة المتطورة اللي حتى أمريكا ما تملكها.. وش هالقمر الصناعي اللي يعرف ريحة الشحاذ من فوق 30.000 قدم.. يا ناس حنا ما قدرنا نحسب كم عدد الصاحين عندنا..عشان نحسب عدد الشحاذين.. ما قدرنا نحسب كم بنت تهرب من أهلها وظلمهم.. يا ناس خافوا الله.. في اللي قاعدين تكتبونه..لأن هالكلام ينعكس علينا سلبا ويتم توظيفه ضدنا.. معقولة حنا.. ينضحك علينا بهالسهولة ونرمي700 مليون من حلالنا بالهواء.. قال دراسة قال.