سياعة سعودية (2)

البارح كنا نحكي عن طبع السعودي بالسفر، وانه يسافر بس عشان يتميلح لارجع، واليوم نكمل الموضوع، وبنص الموضوع سبينا اكثر اطباء النفس عندنا ولا ندري وش دخلهم بالسالفة، بس عاد هم يستاهلون من سود عمايلهم انك تسبهم حتى بالموضوع اللي ما لهم دخل فيهم، أخيرا قرر مجموعة من أطباء علم النفس اننا حنا يالسعوديين ناس ميح في السفر، ولا عندنا ثقافة السفر ويبي لنا كوي عشان نصحي، مهملين بزارينا ورايحين ندوج في بلاد خلق الله، الله يبشركم بالخير يا علماء النفس اخيرا اكتشفتوا ان ما عندنا ثقافة السفر، وش هالاكتشاف الفظيع؟ يقال لكم جايبين شي جديد، هذا الله يصلحكم مكتشفينه من بداية اكتشاف اول بير نفط عندنا، وش خلى اكثر العالم تكره السعودي غير السياح اللي اكثرهم شوه سمعة السعودية، السعودي معروف جدوله بالسفر، ينام كل النهار ويصحى الليل تقل خفاش، اتحداك تشوف سعودي معاه خريطة سياحية، والا كتيب سياحي للبلد اللي هو رايح له، وش خلا سمعتنا دمار غير سياح الليل، واذا تحضرنا مره مره رحنا السينما وشفنا فيلم ورجعنا نكمل الليل، يرجع السعودي لبلده من السفر وهو مرهق ومنتف وحالته حاله، يداوم اول شهر من الاجازة وهو مخه له صفير، وعيونه مترهله وخلقه ضايق، نبيكم يا اطباء النفس بدل ماهريتوا الشعب بمضادات الاكتئاب تطلعون من جحوركم وتتبنون حلول لحالات كثير، واولها حالة السعودي في السفر، ياخي تحركوا، سووا شي!