تحدى على قدك!

صراحة أحيي هالحالة.. فريقك بيلعب مباراة حاسمة بعد اسبوع، تجلس من الحين تتحدى اخوياك، وتكتب لك كم تحليل فني في منتدى رابطة الفريق على النت، ومبطل كل شي وجالس تشوف التشكيلة كيف راح تكون، ومين اللي راح يغيب ومين اللي ماله مزاج يلعب، ووش يحس فيه المدرب، ومين الحكم اللي بيستلم المباراة.. هذا عاد لازم تتأكد منه زين، لا يكون له روحات وجيات منا والا منا، والا يمكن ولد خالته يقرب للظهير الايسر الاحتياطي الفريق الثاني وهذا سبب كافي انه يغش ضدكم!
اسبوع كامل.. ماعندك سالفة غير ياويلكم من لاعبنا الفلاني.. وترانا ناوينكم، ولا تفرحون عشان هزمتونا قبل كم يوم، ترا الوضع غير الحين ياحبيبي، ولا راح ينفعكم اللاعب الخفي ولا النمر المقنع هالمرة، ويستمر الهياط الين تبدا المباراة وتلاقي «الوحوش» اللي معول عليهم كنهم قطاوة في الملعب، واللاعب اللي تتحدى فيه كنه يتمشى في حديقة، وتجيك هزيمة من النوع اللي يحبه قلبك!
انت على نياتك، ومصدق الكابتن حقكم لما قال راح نوريهم شي ماعمرهم شافوه، ومدربكم لما قال انصحهم ينسحبون من الحين، وفي الاخير جت فوق راس هياطك.. ياعمي تبي نصيحتي؟ شجع فريق ماله جمهور.. اذا فاز تفرح زي ماتبي، واذا انهزم ماراح تفرق معاك!