على قل الكلافة!

تصدقون ودي يكون فيه حملات لترشيد العزايم، زي حملات الموية والكهربا، والا يحطون حد ائتماني لحجم الخسائر المترتبة على عشوائية استخدام «اقلطوا يالربع».. وياليت ماحد يهايط ويقول لي علوم رجاجيل ورياضيات فناجيل، لأن الكرم معروف وكلنا نعرفه وهو جزء من اخلاقنا.. لكن للأسف في ناس ماهي راضية تفهم ان التبذير ما له دخل بالتقدير.. ياخوي ممكن تتعامل بطيبة واحترام تعزم الناس زي ماتبي وتحسسهم بقيمتهم.. لكن ما اظن فيها مرجلة يا بطل لما تسوي عزيمة ما ينوكل الا 10% منها ولا اظن فيها شهامة لما تاخذ باقي هالاكل وترميه في الزبالة!
ياعمي شي غريب.. واحد يحط لك في ليلة كمية اكل تساوي كل اللي اكلته خلال سنة كاملة، وتلاقيه مستحي منك وحالته حالة ويقول لك في الاخير«العذر والسموحة، ترا هذا مو عشاك»!.. اجل لو انه عشاي من جد.. كنت بترسل لي اياه في طيارة شحن مثلا؟
واللي استغربه اكثر النوع اللي يعزم ثلاث اشخاص وهو حاط لهم عشا يكفي قرية عدد سكانها 30000 نسمة، واحلى شي في الموضوع انه يقول لهم «حياكم الله على قل الكلافة!» ولما تفكر فيها بشكل حرفي تقول في نفسك «الحين هذا يعتبر انه ماتكلف كثير.. اجل لو بيتكلف من جد وش بيسوي؟».. انا اقترح موسوعة جينيس تكون جاهزة في هالحالة تحسبا لأي طارئ!