«راقي» درج!

مسكين المواطن السعودي يلهث يمين ويسار كنه واحد «راقي» الدرج وصوت فحيح صدره يقطع القلب، وين ما راح مضحوك عليه، عادي أي شي يصير له يبلع القاع ويسكت، لانه عارف ان ماحد مشكيه، ينخصم من حسابك في البنك وتعال قابلني متى ترى اي واحد من موظفين بنك يعطونك وجه، كن طاقتك انفلونزا البعارين وقاعدين ينحاشون منك لا تعديهم، ياناس انا اخوكم مواطن قدر الله علي وصرت عميل لكم، تكفون يا اخوان انسحب من قروشي مبلغ كبير، وآخرتها تروح لمؤسسة النقد والا تروح للأمم المتحدة بل شكواك واشرب مويتها، فيه شركة اتصالات «أجنبية» جايه تلهط اكبر قدر من القروش وتمشي، قاعده تضحك على المواطنين باختراع اسماء رنانة لخدماتها، اذا سمعت الاسم تقول يمكن راح يعطوني قروش ماراح ياخذون منك، قاعدين يستغلون جهل المواطن بسوالف العروض والخدمات، قبل لا تشترك معهم يحسسونك انك كبتن برشلونة، ماباقي الا يتصورون معاك، ويفهمونك انك من عملائهم الافي اي بي، ومن تشترك يسحبون عليك سحبة راح تمر سنين واثارها بجبهتك، اول ما يجونك تحس انك vip، وبعد ما تشترك يرمونك رمية اللي ماني قايل، ولا فيه حماية مستهلك ولا بطيخ، مافيه اي تصرف او ميزة يحسسك انك vip، تصحى من النوم تلاقي جوالك مفصول، كنهم متجمعين واقفين عند جوالك اول مايوصل حده الائتماني يتصايحون: افصل افصل افصل، المفروض يسمون خدماتهم: كحيتي، ابو حديدة، خدمة مفلس، بدال هالاسماء الرنانة اللي خدعتنا وحنا درعمنا مصدقين، واثاري السالفة طلعت خرط في خرط!