نور الأرض

الوطن سلطن على قلبي وجرَّه
جر بيت (ن) من قصيده بالربابه
واستوى لحن المحبة ثم كرَّه
صوت (ن) يهز المشاعر بالتهابه
شوق نور الأرض مسراج المجرَّه
المداين في حضوره مستهابه
جت بحوره حانيه من حول برَّه
تحفظه دانا ثمينه في غبابه
من طفولتنا الموده مستمرَّه
نهر جاري ما نشاري في جنابه
انطلقنا في محانيه انتدرَّه
يبسط كفوفه نطوفه في رحابه
قد مضغنا حلوته ملحه ومرَّه
قد رشفنا عبرته صافي ربابه
قد مشينا في عروقه ذرة ذرَّه
واستقرينا صبابه في شعابه
حب ينمو في الحشا مليون مرَّه
لين صار الأم وأعز القرابه
الشهامه والكرم صافي يدرَّه
ينسكب في بسطته يرقى هضابه
والشجاعة في ذراعه مستقرَّه
تروي السيف المهند لا نصابه
المراجل كلها عشقت مقرَّه
ساكنه في حلته تخشى غيابه
الحنين يروم يمه ما نفرَّه
يرجع يقبل رسومه ويهذابه
قبلة الإسلام جوفه والمبرَّه
القلوب تطوف بيته في مهابه
دعوة الخليل تكفيه المغرَّه
الأمن والرزق ربي فك بابه
والحقود اللي على المله مكرَّه
ملة الإسلام ينخرها غرابه
ما نشوف إلا وجيه (ن) مكفهرَّه
تطبخ الفتنه على روس الغلابه
نقطع إيدين الشرور اللي تثرَّه
وندحر التكفير وأفكار العصابه
الوطن غالي علينا لو نبرَّه
نرفعه عالي على متن السحابه
ما نكيده ما نخونه ما نضرَّه
نراهن أرواح (ن) تربت في ترابه
دونه اسباع (ن) على حدوده تسرَّه
واعذاب اللي ينوشه واعذابه