اغنم زمانك

يا نجم ياللي مطلع الشمس يخفيك
وترجع لنا يا نجم في كل ليلة
اليوم فكري بالقوافي يناديك
ومن بعدها كلٍ يروح فسبيلنه
أبيات فيها النصح يرسي موانيك
والمعذرة يا نجم لو هي طويلة
اسمع قصيدي قبل مالفجر يمحيك
على النوايا الصادقة والنبيلة
قصيدة بالقاف تبنى على إيك
في بحرها المسحوب أرخي هميله
من راس عذبات المكارم أبرويك
ويا ما رويتك بالمعاني الجزيلة
وبنصح بها نفسي قبل ذاك أو ذيك
والعقل حكمة والليالي دويلة
ويا نفس توبي قبل الاقدار تنهيك
ما لك عن المكتوب منهج وحيلة
حكم القدر لاجاك ماظن يخطيك
إما يجيك اليوم ولّا تجيله
ومن يأمن الدنيا بيلقى الهواليك
وان طالت أيامه تراها قليلة
والصبر مفتاح الهموم الدواليك
وبلسم جروح المعضلات الثقيلة
وخل الفضايل مع سواها تداويك
وكل بعد دنياه يجني حصيله
ولا تشتكي للناس تمسي وتشقيك
وشكوى لغير الله تراها ذليلة
وارقى سنود واعتلي في هقاويك
وابعد جنابك عن دروب الرذيلة
وحافظ على دينك ترى الدين يحميك
تكسب رضا ربك وتجني الفضيلة
وصنايع المعروف من شر تنجيك
تحفظك باذن الله وعمرك تطيله
وبر الأبو والأم ربك يجازيك
جنات عدن في رياض ظليلة
واغنم زمانك لاصفت لك لياليك
واشكر بها الرحمن تبقى عليلة
سود الليالي عسرها من جنى ايديك
وكلٍ بصاعه من ذنوبه يكيله
لا تطاوع ابليسك على السوء يغويك
ومن طاوع الشيطان يصبح عميله
وسواس فكره بالشقى لا يدهويك
تلقى الخسارة بالمكاسب نزيلة
وعن مارد الأنذال جنب خطاويك
ومن عاشر الأنذال يجني الفشيلة
واحذر من الذي لا قسى الوقت يشنيك
ممشاه أعوج احذره لا تعيله
الصاحب اللي لا غلا السوم يشريك
احفظ وصاله ولا تدور بديله
والمال كثره لا يغرك ويطغيك
اجمع حلاله والوسخ لا تشيله
وربك ليا منه من الفضل يعطيك
وفه حقوقه قبل ربك يزيله
وقم للضيوم اليا لفوا في أراضيك
واكرم لحاهم بالسمان الجزيلة
درب الكرم والجود يرفع معاليك
درب الكرم ممشى النفوس الجليلة
وصدق الحديث خير الافعال يهديك
وراع الكذب للخير نفسه بخيلة
وعند اللوازم لا يخيب الرجا فيك
وما للوفاء غير الوفاء هو سبيله
والجار له حق ولو كان موذيك
بالصبر والإحسان تشفي غليلة
وبنت الردى ولو كان بالزين يرضيك
حذراك منها تتخذها حليلة
ما تستوي لغيرك ولا تستوي ليك
وتلقى التعاسة في جناها نزيلة
ومن ما يعيب يا ابيض الوجه يسقيك
وبين الرجال اسمك يقيد هبيله
عليك باللي من حياها تشافيك
عليك في بنت الرجال الأصيلة
تحفظ لك فراشك وتحيا وتحييك
وتصبر على سود الليالي الثقيلة
تمت ويا نفسي أنا اليوم بوصيك
قبل الجميع إن كان عقلك دليله