مشروب الطاقة باي باي

بسم الله الرحمن الرحيم اشبو الراجل ده دوبو كان يقرأ في الجريدة وفجأة كده نط فجأة مسك عود المزمار وجلس يلعب؟! ياسيدي إيش حصل إيشبك كده قمت زي المصروع وجلست تلعب مزمار؟ أوووه ياليحه.. ياليحه ياليحه.. ياسيدي إيش في فهمني واترك عنك لعب المزمار،، هوه عاد في مزمار الله يرحم أيام زمان أيام الحارة والمركاز ((زمااان ياعود ماقلبتك الأيادي) شوفي الجريدة وشوفي إيش قرر مجلس الوزراء، حظر الإعلان عن أي مشروب طاقة أو القيام بالحملات الدعائية أو الترويجية له بأي وسيلة إعلامية مقروءة أو مسموعة أو مرئية، أو أي وسيلة أخرى. وكنت أتمنى من وزارة التجارة أنها تتفاعل مع هدا القرار وتمنع بيع مشروبات الطاقة منعا باتا من كل البقالات والسوبرماركات لأنها بصراحه جابت البلا والمرض لشبابنا وبناتنا وأطفالنا. وبيقول القرار كمان إنهم منعوا شركات مشروبات الطاقة والوكلاء والموزعين والمسوقين من رعاية أي مناسبة رياضية أو اجتماعية أو ثقافية يعني لا بيع ولا شراء ولا توزيع ولا حتى إعلانات لها ولا حتى يوزوعوها مجانا على المستهلكين «يعني قفلة بالشيش» والمصيبة الكبيرة إنه بعض الدول الأوروبية منعت بيعها في المحلات التجارية وشبابنا وبناتنا وأطفالنا جالسين يقربعوا ويدردبوا في المشروبات دي ليل نهار عشان كده بقول لكل أب ولكل أم خلوا بالكم من أولادكم وبناتكم وانصحوهم وامنعوهم إنهم يشربوا هادي المشروبات الضارة بصحتهم وانصحوهم وقولوا لهم اشربوا العصيرات الطازجة المصنوعة في البيت أو العصيرات بكل أنواع الفواكه واللي بتنباع في كل البقالات والسوبرماكات واللي بتوزعها أكتر من شركة موجودة في المملكة وصدقوني ما في أحسن من الأكل والشرب الصحي واتركوا عنكم دعايات وإعلانات مشروبات الطاقة اللي حتضر بصحتكم واللي لا سمح الله تجيب خبركم من كتر شربها وانتوا أدرى وأبخص وعيشوا كتييييير تشوفوا كتيييييير.