مابه عسل دون لسع

مباراة الساس

دايم قاعد في غرفته مندغس؛ يهوجس ولا في قرنه؛ يطالع في التلفزيون أو يناحل في أهله في البيت وممتحن خواته، ولا يدوج في ذا الشوارع أو ينصب في الأسواق، وإذا شاف الهيئة يتكرفت في المحلات على أساس يدور شغل وينام طول النهار وفي الليل يباري الساس تقول مسوي مصيبة؛ وإذا أهله قالوا انكس بننهج للسوق قال ماني فاضي بدور وظيفة وشغلته الوحيدة يمطرس في البيت والوقت غدى وهو على حاله؛ وكل ما احد سأله عن الوظيفة ارتبش وقعد يتحجج.
ولا قالوا ليش خلصت الوظايف قال ماصيدي كذا !بس مالقيت اللي يناسبني، والمشكلة ماعنده مؤهلات وآخر شهادة عنده الكفاءة ومقرود لا ويجيك يتفلسف وهو كوده يفك الخط، وهقوتي حتى جدول الضرب ناسيه وإذا أبوه عاتبه على قعدته في البيت عصب وزعل وقال حست مريريى ولجيتني.
لا ياشيخ بالله عطني مواصفات الوظيفه اللي يبيها طال عمره إذا حارس أمن ماهو عاجبه وبياع في المحلات مايبا وعيب والعسكريه كرف والشركات مابها مستقبل؟ ياهملالي بس على شبابنا يبون يغيرون القرمبع بدون ما يدهرون، ياعيالي وش بلاكم ماشيء يجي بلا تعب واللي يبى العسل يتحمل لسعات النحل.
مندغس = داخل في مكان ساتر / دوشقه= فراشه / يهوجس= يفكر بصمت / قرنه = زاويه / يناحل = يخاصم / يدوج = يفرفر / ينصب = يغازل / يتكرفت = يذهب مسرعا / انكس = ارجع / يباري الساس = يمشي بجانب الجدار ويتوارى في الظلام / ننهج = نذهب / يمطرس = يخرب / غدى = ضاع/ ارتبش = ارتبك / ماصيدي = ماقصدي / مقرود = قليل الحظ / كوده = بالكاد / هقوتي = باعتقادي / حست مريري = عكرت مزاجي / لجيتني = ازعجتني / ياهملالي = أداة تعجب / القرمبع = السيارة القديمة / يدهرون = يبدؤون في العمل بعد معاناة في تشغيله