الغشيم

مستحيل ما يكون فيه شخص بهالدنيا ما يعرف وش معنى كلمة غشيم، الغشامة فهاوة مستفحلة تركد أحيان وأحيان تعدم راعيها ما تفكه إلا بعد ما هو حايس الدنيا وجايب العيد، الغشيم دايم يتوقع أن الحكي اللي يقوله صحيح، وأنه أفهم واحد، والناس تاركته على كيفه لأنه مستحيل يقتنع، المشكلة أن الإنسان مهما درس وتعلم ما راح تنظف خلايا مخه من الغشامة، وفيه غشامة كلية وغشامة جزئية، يعني فيه شخص غشيم بشي بس صاحي بباقي الأشياء، وفيه غشيم كومبوليتلي يعني وين ما طقها عوجا، وهذا الله لا يبلانا لو تطليه بلحام بارد أو تصكه بفليت القوة الثلاثية ما راح يصحى قلبه، مشكلة الغشيم ما هي بس عليه مشكلته توصل للي معاه من الأصدقاء ويمكن توهق حارة كاملة معاه، وأكبر مشكلة بالدنيا توهق اللي يسافر معاه، انتبه تسافر مع واحد غشيم، تراك ترجع متنكد وكاره السفر وسنين السفر، لا صرت رايح تفسح عن نفسك ورايح تمشى بين الحدايق والمطر ويطلع لك بنص السفرية يبي يرجع لأهله لأنه يحس أن أهله يمكن يطب عليهم حرامي وهو مو موجود وتصير عيبه بلحيته، يقوم يهوجس ويطلع لك سوالف يخرب عليك جو السفر كله، ويمكن بعد يشوف ناس يعرفهم ويسوي لهم ذبيحة وتروح رحلتك كلها مكافحة بهالغشيم!