أمانة جدة والطفش

بالبلدي الفصيح

زارتنا البركة والله يخويا يبو فتو كيفك وكيف أولادك؟ كلنا بخير الحمدلله. إنتي كيفك يا اختي يا معتوقة وكيف أولادك وبناتك عساهم بخير؟ الحمد لله كلنا بخير ويقبلو اياديك. وفينهم ماني شايف ولا احد منهم لا من الاولاد ولا من البنات؟ الاولاد خرجوا يلعبوا كورة مع اصحابهم والبنات لسه نايمين ماصحيوا. نايمييين؟!! الساعة خمسة العصر يا معتوقة وتقوليلي نايمين؟ إيوه نايمين ياخويا من يوم ماجات الإجازة وحالهم على دا الموال سهر في الليل ونوم لين العصر بس يادوب يقوموا يصلوا صلواتهم ويرجعوا يناموا وزي منتا عارف يا اخويا نحنا ماربينا بناتنا على الخرجات والطلعات والاسواق والكافيهات إللي ماوراها إلا الخراب والفساد، طيب يا اختي يا معتوقة كدا ما يصير بس سهر ونوم؟ طيب فين يروحوا يا سيدي وانت عارف انو ما في حدائق عامة خاصة للبنات والحريم ولا حتى اندية رياضية نسائية يروحولها واذا يبغوا يمشوا على الارصفة اللي موجوده بجنب الاسوار الغزلنجية ما يتركوا احد في حاله واذا يبغوا يشتركوا في المراكز الرياضية النسائيه إللي موجودة في المستشفيات يبغالهم مبلغ وقدره وإنته عارف البير وغطاه والمدارس زي منتا عارف من يوم ما ياخدوا نتايجهم يقفلوا ابوابهم والمفروض تكون مفتوحة وتكون فيها مسابقات رياضية ونشاطات مختلفة طالما مافي حدائق عامة ولا اندية نسائيه وزي منت عارف انه نسبة البنات البدينات زادت زي ما بيقولوا المختصين والمستشارين وهدا كله بسبب عدم وجود حدايق عامة واندية خاصة للبنات. والله يا أختي ما ادري ايش اقولك بس اللي اعرفوا انه في كل دول العالم بيكون في كل حي حديقه عامه بيمارس كل الجيران اللي ساكنيين في الحي كل نشاطاتهم الاجتماعية والرياضية والمفروض عندنا يكون في كل حي من احياء جدة حديقة عامه مساحتها تكون طيبة وفيها قسم خاص للرجال وقسم خاص للنساء ومتوفر فيها اماكن لرياضة المشي وفيها نادي رياضي مجهز بكل الالات الرياضية ومسبح نسائي خاص ولكل الاعمار، ويكون متوفر فيه كل الحاجات إللي يحتاجها البني ادم من دورات مياه ومسجد ويكون فيها اكشاك صغيرة، ينباع فيها المكسرات والبسكويتات والمشروبات الباردة والساخنة ويكون الدخول لهادي الحدايق برسوم رمزية عشان لا تزعل علينا امانة جدة وتقول كل شي يبغووه بلوووشي لكن اللي بيحصل انه لما يكون في الكروكي حق المخطط حدايق عامة للحي في حدود 6 او 8 حدايق تلاقيها ارض جرداء ولو استنينا الامانه انها تحط بالها منها وتبنيها وتخليها حديقة لسكان الحي حنقعد نغني ياليل مطولك او انه يجي مجموعة من اللي بالي بالكم ويطبقوا على هادي الحدائق اللي خصصتها الأمانة لسكان الحي وتصير بقدرة قادر من املاكه الخاصة وضاع الحي وراحوا سكانه فطيس وهما كان عندهم امل انه يكون موجود في حيهم حدايق عامة يستفيدوا منها ويقضوا فيها مع اهلهم وعوايلهم واولادهم وبناتهم احلا الاوقات ونفتك من كلمة طفش اللي بنسمعها دايما وبكترة في بيوت الغلابا وخاصة من البنات وانا بقول غلابا لانهم بيقضوا اجازتهم في بيوتهم لكن غيرهم بيقضوها في بلد الله الواسعه.
abofatoo@hotmail.com
للتواصل أرسل رسالة نصية sms إلى 88548 الاتصالات أو 636250 موبايلي أو 737701 زين تبدأ بالرمز 150 مسافة ثم الرسالة