المحبة

عليش من قاصي شعور المحبين
أقصى مشاريه الغلا والمحبة
يا هاجس التفكير رايح على وين
من نزغة المذنب توق وتنبه
ما عاد به شكه ولا فيه تخمين
من يوم صرنا للغلط والمسبة
أهداف لأفكار الفتن والشياطين
الكذب مثل الموج والصدق غبه
يا صاحبي يا فرحة البال والعين
يا جرح قلبي يا علاجه وطبه
لولا المحبة ما عرفنا المحبين
ولا الذي يزعل على كل سبة
إليا عشقنا عشقنا فالميادين
أروع مثل فالحب ياما ضربه
وإليا كرهنا كرهنا للمعادين
عدونا فالراس يطحن بحبه
يا بنت يا تاج الفخر شيخة الزين
لا لا من الحبة اتسوين قبة
إما غرام يشرح البال والعين
وإلا بلاش من الغلا والمحبة
سعيد بن شريم