عروس عاشت تحت بند الأرامل

تدري وش اللي يجبر البنت للشين
سياسة العنف العمى بالتعامل
والقمع في حرية الفكر تلقين
ومقارنة نقص العقل ضد كامل
وممارسة أخطاء ضد القوانين
نتاجها محزن ومبكي وشامل
رفقا بهن لانزيد في بلة الطين
رفقا بهن لانزيد حمق وتحامل
لنرفع شعار التعامل مع اللين
واللين في نفسية البنت عامل
حتى بقضية تكملة نصف هالدين
ممنوع تجبر بنت في راي صامل
لها اختيار وراي من بين قوسين
وعطها الأحقيه وحذرا تجامل
في مسألة إجبار بالغصب روحين
ياخي ترا الدنيا شعور وتكامل
شف كم قضيه حاصله وأبكت العين
سبة فكر رجعي وسافل وهامل
واللي يزيد الجرح ويصير جرحين
عروس عاشت تحت بند الأرامل
عاشت تحت عنف وتحطم وتوطين
وشعور قاسي بالألم واهي حامل
سحقا لبعض أفكاركم ياسخيفين
وإليا متى في بعض الأفكار نآمل
وتدري وش اللي يجبر البنت للشين
لاصار قمع البنت أفضل تعامل
* ماهر العايد