لآلئ شعرية

اللي تبي تشري قلوب الناس ماهي مستواي
ترحل وانا بقول يابنت الكرام مجمله
ماجيت اساوم في زحام الحب عن قيمة غلاي
ولاجيت ابسأل عن خطا الايام والا اعلله
انا وضوحي يفضح الاسرار وجروحي وفاي
وانتي رميتي قلبي المسكين لاول معضله
يابنت انا شاعر على قدي وماقدي وراي
لاجيت اعدل حظي المنكوب وقتي ميّله
انا بدوي على السليقه لاعلي ولامعاي
امشي على وضح النقا تالي زماني واوله
كنت احسب ان الشعروالابيات ماتعرف سواي
جاهل وانا اعرف اللي صارواقول اجهله
ماكنت ابي شهرة ابوفراس يكفيني فضاي
ودي احلق عن غثا الاسراب واعلو منزله
وانتي قريتني مثل ماكان يقراني خفاي
روحي بمان الله يابنت الكرام مدللة
وانا بسافر مع جروح القلب وادور سماي
وتبقين في دفتر حياة الشعر اسوا مرحله