غيم الشعر

فز القصيد و لاحت بروق ورعود
بين القوافي والمعاني عذيّه
وامطرت من غيم الشعر كل موعود
بابيات شعري والمشاعر نديّه
ولمت الصدور اللي بها الصدق مفقود
في طرح واضح والمواجع قويّه
دام الخوي ما له مواثيق وعهود
ما هو خوي ان ما وقف مع خويّه
بعض الصداقه تنبني صح وتزود
صدق ووفا بين القلوب الوفيّه
مضمونها مبني على الطيب والجود
يبقى ما بين اهل النفوس النقيّه
لا كشرت في وقتك ايامك السود
تلقى رفيق الروح صبح وعشيّه
يسقيك من عذب المشاعر بلا حدود
مثل المطر من عند رب البريّه
وبعض الصداقه دربها فيه منقود
لا بد منها ما تجيك الأذيّه
يمكن تشوف الود بقياس محدود
ثم تكتشف خبث النوايا الخفيّه
عمر الغلا ما كان بشروط و بنود
الا ما بين عقول ياهي غبيّه
وعمر الخطا لو كان من غير مقصود
ما يزعل احدٍ راس ماله خويّه