دردشة اطفال

@ ما اسمك..؟
فطومة.
@ هذا اسمك ولا الدلع؟
كيفك تبينه دلع والا الحقيقي.
@ يقولون أسمك (فاطمة عدنان.. صح؟
أيش دراك مين اللي قالك.
@ دبدوب اللي قال لي؟
بس هو ما يتكلم.
@ بس معاي تكلم حتى قال ان عمر فاطمة (ست سنين صح..؟
لا عمر سبعة السنة الجاية بيكون ستة.
@ يعني تصيرين أصغر من الحين..
لا أكبر.
@ طيب تحبين المدرسة.. والا الروضة؟
المدرسة عشان كلها بنات ما فيها أولاد.
@ ليه تحبين البنات أكثر من الأولاد..؟ عشان مثلي العب معاهم بدون ما يضربوني.
@ تحبين الألعاب؟
أيوه.. زي لعبة صحون المطبخ.
@ هذي كيف تلعبونها؟
زي الكبار نسوي أنفسنا حريم.
@ ليه انتم الحين ما انتم (حريم)؟
لا احنا بنات صغار ما نلبس العباية.
@ تعرفين وين يشتغل بابا؟
أيوه.. على سكة الحديد.
@ كيف على سكة الحديد؟
يعني يوقف على الحديد ويكتب.
@ طيب.. وش أكثر الحيوانات تحبين؟
الجمل عشانه كبير وعلى ظهرة خيمة.
@ اذا صارت عندك فلوس وش تسوين فيها؟
اسافر على طول.
@ وين.. وليه؟
اسافر الإمارات وادور عند الثلج عن الحر هنا.
@ واشترى فواكه كثيرة زي الفراولة والمانجا وشوكولاته.
@ لما تكبرين وش ودك تصرين؟
أبلة أطفال.
@ يعني في الروضة؟
لا في المدرسة البنات.
@ (فطومة) تعرفين كيف تصلين؟
أيه.. افرش السجادة والبس الحجاب اقول "الله أكبر".
@ طيب.. (فطومة) آخر كلمة وش تقولين؟
مع السلامة وشكرا لكم وقولي لمدير كم يجي للقهوة عندنا.
@ وانا ما تحبيني أجي للقهوة عندكم؟
الا انتي تجين معه.. لان نحبك وانا احب بابا وماما.