وزير المعارف.. "ما أعرف اسمه لكان جبت له عصير"

دردشة أطفال

ما اسمك؟
* مهند الزهراني
وش معنى اسمك؟
* الولد
وش اكبر امنية تتمنى تتحقق؟
* اسوق سيارة واكبر عشان يصير عمري عشرة وروح وحدي عشان اشتري الكتكوت (صوص).
طيب الكتكوت منين يجي؟
* في بطن الدجاجة
طيب منين تجي البيضة؟
* من السوق!
اقصد منين تطلع؟
* ابونا هو اللي يجيب البيض
ودك تسافر يا مهندي؟
* ايوه اذا كبرت ابروح الدمام وحدي.. الحين عمري ست ما عليش اروح بالباص
طيب تحب البنات والا الاولاد؟
* الاولاد طبعا انا رجال والرجال يلعب مع اللي زيه ما يلعب مع البنات عيب!!
طيب ابوك وين يشتغل؟
* عند السكريات
وش رايك بامريكا؟
* مو حلوة عشان فيها جرب
كيف الواحد يصير قوي؟
* لازم يسوي رياضة ويأكل كل شيء
تعرف وين نلقى فيتامين الحديد؟
* هذا ما يقدرون الناس يأكلونه
ليش.. هذا يفيدهم؟
* لانه حديد يفيدهم اذا سوى فيه رياضة
طيب اذا صار عندك فلوس كثيرة وش تسوي؟
* اشتري حاجات وفرقها على الاولاد واذا بغوا حاجة اشتري لهم كل يوم عصير واذا خلص اقول خذ بعد عصير ثاني.
ليش تشتري لهم العصير؟
* عشان ما يجعون
وبالعصير يشبعون؟
* ايه.. عشان مفيد
طيب انت تحب المدرسة؟
* طبعا عشان نتعلم فيها
وش تتعلمون؟
* الحروف والارقام والقرآن
اذا كبرت وش ودك تصير؟
* شرطي بالبحر
وش رأيك بالشرطة اللي مو بالبحر؟
* تقصدين اللي في الشوارع!
نعم.. شلون شايفهم؟
* كل يوم الصبح اشوفهم في كل شارع وانا رايح المدرسة وشفتهم بعد حاطين على فمهم كمامات
ليش حاطين الكمامات؟
* عشان الحرامية
مهند.. تحب المستشفيات؟
* ايوه عشان نتعالج فيها إذا مرضنا
طيب لما نزور المريض بالمستشفى وش نقوله؟
* الله يسلمك.. ويخليك سالم لامك وابوك
مهند.. شتقول لوزير المعارف.. هذا اللي يسوي المدرسة؟
* الله يخليه بس انا ما اعرف اسمه عشان اجيب له عصير
وش آخر كلمة تقولها؟
* احب المدرسة وكل الناس واحبكم عشان تسولفون معاي (ونستوني) تعالوا بكره بعد.