دردشة أطفال

@ ما اسمك..؟
* نوف الموسى.
@ كم عمرك؟
* ما ادري..!
@ طيب انت تدرسين..؟
* ايوه
@ طيب كيف ما تعرفين عمرك؟
* ما ادري اسأل ابوي والا امي انا استحي.
@ وش تستحين منه..؟
* اقول عمري.
@ اي طيب انت باي صف..؟
* الروضة.
@ وش يدرسونك بالروضة؟
* كل شي واي شيء.
@ مثل ايش تدرسون؟
* ندرس القرآن والانجليزي والرياضيات.
@ طيب وش اكثر مادة تحبين..؟
* القران.
@ تعرفين انجليزي؟
* ايوه اعرفه.
@ طيب what is your name؟
* اااايش وش ذا ما عرفه.
@ توك تقولين اعرف الانجليزي؟
* اعرف بس استحي.. وبعدين انا قلت ادرسه مو اقوله بس اذا كبرت بعرفه بعدين اسأليني عنه.
@ طيب انت تحبين اكثر شيء القرآن وش هو القرآن.
* كلام ربي؟
@ ليش تحبينه؟
* عشان آخذ أجر وادخل الجنة.
@ لما نجحتي عطوك هدية النجاح؟
* ايوه.. عطوني صيادة سمك.
@ وش يسوون فيها هذا..؟
* يلعبون صيادين سمك.
@ يعني ما تصيد السمك؟
* الا تصيده بس بعد يلعبون بها.
@ طيب انت تحبين السمك؟
* ايوه احبه وألعب فيه يطلع من البحر.
@ السمك يتكلم..؟
* لا ما يتكلم.
@ طيب ليه؟
* عشان ماله اللسان بس تطلعنا بعيونها.
@ بس السمكة عندها اللسان؟
* بس مرة صغير حتى ما ينشاف.
@ يقولون انك لما نجحتي وديتي حلاو للمدرسة؟
* ايوه وديت لهم حلاو واجد بس هذي روضة ما هي مدرسة.
@ طيب من عطيتي من الحلاو؟
* ابلتي.
@ بس الابلة والبنات اللى معاك عطيتيهم..؟
* لا ماعطيتهم.
@ ليش..؟
* ما لقيتهم.. شسوي تبيني اروح لهم بعد لبيوتهم.
@ تعرفين تطبخين..؟
* لا.
@ طيب ليه؟
* عشاني توني صغيرة.
@ يعني ما تدخلين المطبخ؟
* الا ادخله بس عشان اكل باميه لان احبها مرة.
@ من وين نجيب البامية؟
* من البحر.
@ لما تكبرين وش ودك تصيرين؟
* مدرسة يعني (الابله).
@ وش معنى (ابله) ليه ما هو طيبه؟
* عشان (الابله) تدرس العيال الصغار والطبيبة تعطيهم ابرة ما احد يحبها.
@ نوفا عندك صديقات؟
* عندي واجد.
@ وش تسوين يا شفتيهم..؟
* نلعب لعبة بنات.
@ ولعبة البنات كيف؟
* مطبخ وجلسة حريم.
@ بس انتي ما تعرفين تطبخين..؟
* ماعرف بس هذي لعبة ماهي صدق.
@ طيب وش اكثر لعبة تحبين تلعبي..؟
* الغميمة انا وصديقاتي ونطالع سبايس تون.
@ طيب انت تسوقين سيارة..؟
* لا.. بس الاولاد اللي يسوقون.
@ طيب تحبين الطيارة..؟
* ايوه عشان تطير فينا للرياض.
@ عند مين توديكم؟
* خوالاي وخالاتي.
@ يحفظونك بالروضة انشودة..؟
* أيوه اسمعك إياها.
@ الناس تحب الفلوس انت تحبينها بعد؟
* ايوه احبها عشان اشتري فيها كل شيء.
@ لما الواحد يتدخل بشيء ما هو له وش تقولين له..؟
* اقوله من حسن إسلام المرء ترك ما لا يعنيه.
@ لمين قلتيها..؟
* حق اخوي مرة كان يبي يفتح هديتي اللي جبتها من الابلة وقلتها له.