حسرة

قصيدة اللواء متقاعد/ عبدالله العثمان في رثاء المغفور له بإذن الله الفريق متقاعد/ علي بن شعوف المطيري
القلب يابندر بما فيه مذبوح
.......ليتك تعرف اغضايتي وش سببها
جاني من اقصى الغرب يا ورع ساموح
......اعمى البصيرة والغرايز جذبها
ليت الرسول اللي رما بعد الشوح
......اخير من رميه غلط ما حسبها
خلا دموعي مثل وبل على ضوح
......حمر هماليل سريع ندبها
اقرا يجيني الحرف يا ورع مجروح
......كن الحروف تحدني عن عتبها
ليت الحروف تحسن مثلي وانا انوح
.....حتى تعرف النار وش هو حطبها
المشكلة خطر سببها على الروح
.....فرقا وليفي سمعته ما خطبها
اشهر من القمرا على الضلع بوضوح
.....ضلع السراة اللي بعيد جذبها
لو ينفدى بالروح لفديه بالروح
.....حتى يحقق للقبيلة طلبها
علي ليا جف القلم وامتلا اللوح
......وضاقت على المحتاج نفسه جلبها
ابن شعوف اللي على الطيب منصوح
......مامورة نفسه ولو ما غصبها
ريف الكريم ليا تقاصى عن البوح
......وريف الضعيف ليا استحى ثم كتبها
يامل قلب كله الآم وجروح
.....حتى شرايين الضماير حربها
زادت حرارتها على طاير الفوح
....واخاف لا يقطع لظاها لهبها
لا محيي ميت ولا مبري جروح
....ولارافع عن بعض الانفس نشبها
لكنها حسرة تجي وقت وتروح
.....تشقى نفوس الطيبين بسببها