أغلى من الروح

يا وجودي في ضحى العيد يوم انّي بكيت
العرب حولي ولافيه من هو لد لي
طاحت الدمعة على الخد في ساعة طريت
واحدٍ اغلى من الروح واقرب من هلي
ليتني ما شفت رقمه ولاعنّه دريت
وليت سوّا خير فيني و لاعيّد علي
وش يفيد اليوم دامك على الفرقا قويت
وش يفيد الحين تسأل عن اسباب ازعلي
ليه تنبش جرح مبطي وانا عنّه سليت
منه كان الصدر دايم يفيض ويمتلي
ليه تظلمني وانا اللي على وضعك رضيت
ومارضا قلبي بغيرك معه مستقبلي
كم تحملت الخطا منك كم عنّك عفيت
والنتيجه جرح ينزف وعينٍ تهملي
في ضحى الفرقا تراني بموت ولانسيت
دمعة عيونك وقولك تراني مبتلي
لو رجعنا للحقيقه أنا فيك ابتليت
في نهارٍ ليتني فيه ماسقت اجملي
لا تفكر في رجوعي وهذا ما جنيت
غير نارٍ في ضلوعك لظاها يصطلي
العوض في واحدٍ له مع الاجواد صيت
لاعبس وجه الزمن شال حمله واحملي
الوفا والحب والشوق منّه قد حظيت
لو طلبته حاجةٍ قال: سمي وازهلي
ويا وجودي في ضحى العيد يوم انّي بكيت
ليت سوّا خير فيني ولاعيّد علي
النادرة