الجزء الثاني من حوار خاص وحصري عبر صحيفة التميز الإلكترونية مع الكابتن سامي شاص لاعب نادي الإتحاد

الليلة نكمل حوارنا مع الكابتن سامي شاص لاعب نادي الاتحاد السابق..
جماهير نادي الإتحاد أصيبت بخيبة كبيرة من المستويات المتدنية لفريق كرة القدم بنادي الإتحاد خلال السنتين الأخيرة وبعد النادي عن تحقيق البطولات ماهو السبب في نظرك ؟
السبب واضح وصريح إنت إيش تتوقع من نادي يديره إبراهيم البلوي ..إيش ابراهيم البلوي إيش فكره وليش شهادته رجل مافي رأسه أي فكر كروي أو إداري ..كيف يديرها ..هي كانت أساسا لعبة على أساس هو رئيس في الواجهة ويديرها منصور ..لكن سبحان الله ربي وضع كيدهم في نحرهم وأوقعهم في شر أعمالهم ..اللعبة صارت وطبعا لا أحد ينكر إن منصور البلوي حقق إنجازات ولكن ماحققها بمفرده وليس بمجهوده وحده الرجل الداعم الأول الحقيقي لنادي الاتحاد هو عبدالمحسن أل الشيخ .. قيس عليها ايش تتوقع الرجل شوه سمعة نادي الاتحاد بوعود كاذبه وميزانية مفتوحة وميزانية منفوخه كلها كذب في كذب انت تضحك على الجمهور ويش ذنب المشجع الاتحادي والجماهير ماراح تسكت من أجل مصلحة النادي زي ماحرضوا الجماهير على عم محمد الفايز وكما تدين تدان .
هل سيعود الاتحاد لسابق عهده ويحقق البطولات ؟
الإتحاد لن ينتهي ولن يبقى على اسم رجل واحد الاتحاد كيان شامخ من يوم تأسس و نادي الاتحاد نادي الاتحاد أعرق الأندية السعودية وهو مطمع لجميع الانديه والتجار والشركات فلذلك نادي الاتحاد شامخ برجاله وبجماهيره وبلعيبته نادي الاتحاد لن يقف على اسم أو شخص واحد وكل من خدم نادي الاتحاد نقول له مشكور مع السلامه كفيت ووفيت ولكن تلعب بمشاعر الاتحاد وتلعب في النادي وتخلي النادي مصدر رزق لك وانت منتفع من النادي لا والف لا وقف عند حدك وابعد عن النادي بكرامتك .
ذكرياتك عن شهر رمضان المبارك ؟
للأسف احنا في شمال جدة ماتقارنها في جنوب جده من الحواري من البساطة من محبة الشباب بينهم وبين بعض وانا واحد من الناس اللي دايما في شهر رمضان أحرص على حضور المهرجانات في جدة التاريخية وأحرص على زيارة الأصحاب في الهنداويه والكندره والدواري المعروفه في جده ..حريص كل الحرص على التواجد وهي فرصه ورمضان فترة بسيطه ولا ننسى الإفطار مع الأحبة وهذا شيء
إيجابي لي ..وبالنسبة كلاعب احرص اني اكون متواجد في المناطق الشعبية لأنه منها طلعنا ومنها نرجع وليس عيبا ولا هو غرور أن الواحد طالع وفي فمه ملعقه من ذهب لكن شراء الناس وشراء الاحباب لاتدركه حتى بكنوز الدنيا وشوفتهم تسوى كنوز الدنيا.
شخصية تحرص على الإفطار معها في رمضان ؟
الوالد والوالده الله يحفظهم ويطول في أعمارهم واخواني وأسرتي واحبابي وأولادي دايما في الفطور اكون متواجد في بيت الوالده والوالد وإذا جات دعوات خارجيه مجبورين نلبي الدعوة ولكن يظل اكل البيت هو الاميز وهو الألذ والأفضل.
وجبتك المفضلة على الإفطار ؟
وجبتي على الإفطار هي التمر واللبن والفول الطبق الرئيسي .
كلمتك لجماهير نادي الاتحاد ؟
أناشد جماهير نادي الاتحاد بالوقوف بجانب الكيان الاتحادي في الوقت الحالي وفي الفترة الحالية دعمكم لنادي الاتحاد فقط للكيان الاتحادي لا للأشخاص إحنا في مرحلة جدا قوية ونادي الاتحاد محتاج لتكاتف الجميع كفاية الخذلان اللي حصل في نادي الاتحاد كفاية الضحك والكذب اللي تلقاه الجماهير الاتحاد نادي موجوع من كل اتجاه نمرنا مجروح هذه يمكن بصريح العبارة أعطيك إياها خذلونا كثير ضيعوا الاتحاد ..شباب الاتحاد ضاع إستراتيجية وهيبة الكيان الإتحادي ضاعت فلذلك أنا حريص على جميع الجماهير الاتحادية الوفيه انهم يكونوا حريصين كل الحرص على أنهم يشيلوا الغمامة اللي في رأسهم ويلتفتوا ويتجهوا للكيان الإتحادي بلاش فلان وفلان اللي محد عرفهم إلا من نادي الاتحاد ولذلك انا اقولهم كيانكم للكيان قبل الأشخاص وهذا شيء مهم وان شاء الله ربي يصلح حال الاتحاد وقريبا أن شاءالله دعواتنا أن ربي يبعد الإعلام المنتفع والمرتزق من نادي الاتحاد ليعود الاتحاد لمنصات التتويج ولا أخفيكم أن الأندية السعودية مقبلة إقبال كبير على الخصخصة ولعلمكم برغم أن نادي الاتحاد واقع وقوع مر ولكن يظل مطمع من جميع التجار والشركات احذروا ياجماهير الاتحاد الاتحاد بيروح لأشخاص يمتلكوه ..الاتحاد نادي الشعب وانا متأكد ومتوقع أن نادي الاتحاد مطمع لكل التجار ..لذلك هذه رسالة أوجهها لجماهير نادي الاتحاد احذروا وكفاية أن جماهير الاتحاد تسدد قرض خطأ إدارة سابقة هذه لعبة اتلعبت في نادي الاتحاد وهذا كلام خطير واول مرة اقوله وانا ملزم بكلامي إدارة نادي الاتحاد السابقة لعبت لعبة مع تجار كبار للاستيلاء على نادي الاتحاد فأخذوا القرض بمقابل دعاية وإعلان مجاني ومقابل انه جماهير الاتحاد هي اللي تسدد من الدخل الجماهيري يعني لعبة قذرة والجماعه كلهم يبغوا يستولوا على نادي الاتحاد ونادي الاتحاد مطمع لجميع التجار .وإن مايدور من أحداث في الكرة السعودية ومن تدهور تام والتدهور هذا من صنع أنفسنا نحن والمسؤولين طبعا هم من أراد بالرياضة السعودية تكون بهذا الحال ورياضتنا ضايعه ضايعه لأبعد حد أمام الجميع الدول المجاوره كنا متقدمين عنها سنين وسنين الآن الدول المجاورة كلها سبقتنا واحنا في مكاننا ولازلنا عايشين على أطلال الماضي أن احنا لازلنا أبطال ولازلنا ننافس شوف الدوري عندنا دوري ضعيف تعبان ولازلنا نكذب على أنفسنا ونقول أن دورينا قوي وهو كله فشل في فشل والأحداث اللي تدور في نادي الاتحاد أو الأندية السعودية في مختلف الألعاب بصراحه اللي يدور في الرياضه السعوديه هذا لايمت ولايرتقي للوطن ولابحجم المملكة العربية السعودية كل اللي يصير معقولة مافي حلول الدولة جزاها الله خير وفرت كل سبل الراحة لنا لكن احنا اللي جالسين نتعطل ومانبغى ننجز لمصالح مشتركه بيننا فلان مصلحته مع فلان وعمرنا ماراح ننجح أو نتطور فلذلك نحن في خطر ولابد نعي هذا الخطر يجب علينا أن نصحى ونصحصح واحب نبارك لجماهير نادي الاتحاد والرجال الاتحاد الحمد لله الذي بفضله تم تطهير النادي وعودته لرجاله ومحبينه الحمد لله على هذا الفضل وأحب أوجه تحية خاصة كبيرة لجمهور نادي الاتحاد لمحبين الكيان وليس محبين للأشخاص اتمنى تكاتف الجميع في المرحلة القادمة فهذا مايميز الاتحاد من سنين ومنذ عصور سابقه التكاتف الآن مهم جدا ومطلوب من الجميع لابد أن يعي الجمهور الاتحادي المرحلة القادمة مرحلة حساسه مطلوب من كل فرد من جماهير الاتحاد الوقوف مع ناديها ولكن نحن من نريد أن يرجع الاتحاد لسابق عهده والرياضه السعودية لن تتطور أو تنظف إلا بإبعاد البلوي والحمد لله أبعد فماذا بقي من الجمهور الاتحادي أن يردد ذكرهم الاتحاد صرح شامخ يبقى للأبد والأسماء تجي وتروح والاتحاد لايتوقف على اسم شخص واحد واتمنى من الجميع الالتفاف حول النادي وهذا ليس مستغرب عليكم ودعم النادي بالحصول على بطاقة العضوية وبذلك يحق لهم التصويت في اي انتخابات قادمه وأسأل الله أن يوفق الإدارة الجديدة وان يكتب لهم التوفيق والسداد وان يعود الإتحاد إلى أمجاده وسابق عهده والحمد لله رجع الاتحاد لرجالات الاتحاد الحقيقين ورجع لأهل الاتحاد بدل ماكنا عايشين في الماضي على وهم ووعود كاذبه وخداع وشتان بين جماهير واعلام وجماهير وان شاء الله بتكاتف الجميع ستروا الاتحاد قادم من جديد .

وفي لختام نشكرك وكل عام وانت بخير ؟
وإنت طيب وان شاء الله كنت ضيف لطيف وخفيف ووضحت كثير من الحقايق ووضحت للجماهير انه لازم تنتبه من الاعلام اللي محسوب على نادي الاتحاد.