اللغز

كان كاتب اللغز الماضي الشاعر علي رشيد الرشيد من رياض الخبرا والذي يقول:
انشدك عن رجل مقدر ومحشوم
في كل ديره منزله فوق مشراف
كلن يعرفه للبشر صار معلوم
في وسطه المفتاح بالعين تنشاف
وقد توصل للحل شعرا :
انا قريت اللغز والحل ملزوم
ودي أبين مع هل الحل ميقاف
هذا علم للملكة عالي دوم
به كلمة التوحيد من ضمن الأوصاف
طلال الرشيد-الجبيل
يابن رشيد اللغز واضح ومعروف
وانا بحل اللغز يالقرم عراف
هذا علمنا بالجزيلات موصوف
الله يعز اللي لها درع واسياف
احمد بن ناصر المحرج - الرياض
يا مرحبا واللغز واضح ومفهوم
مكمل وافي على زين الأهداف
الحل أجيبه قبل ما يلفي النوم
هذا علم للملكة دوم ينشاف
فالح غازي الحربي - رياض الخبراء
يابو رشيد الحل ياصلك مختوم
في وسط ظرفه والتحية له غلاف
هذا علمنا يرتفع فوق ويشوم
وشهادة التوحيد تكفيه الأوصاف
سالم العرجاني - الحائر
يامرحبا باللي بنى لغزنا اليوم
عبر الخزامى كلها عبر الأرياف
الرايه الخضراء ترفرف على الدوم
اللغز حله بالعلم جبت الأوصاف
عبدالمحسن بن محمد المحيسن - رياض الخبرا
هذا العلم اللي مقدر ومحشوم
مع كلمة التوحيد وسطه وتنشاف
هي المفتاح اللي بغيته ومعلوم
يا مرحبا باللي كريم ومضياف
محمد ابو دحيم - البدائع
في خدمته والله مانسمع اللوم
من مات في ضله يحطه له اللحاف
هذى العلم وسيف برسم مرسوم
ولله كتب فوقه للنظار ينشاف
سعدصنهات السهلي - الدرعية
لغز الاسبوع
يكتبه للصفحة الشاعر رشيد الفريدي من بريدة ويقول:
انشدك منهم ثلاثه وامهم وحده
وعيالها كل واحد جاك من ديره
واحد خوي للنشاما شيخ مابعده
وواحد وسط غالب شره على خيره
وواحد ردي يحرص العاقل على بعده
يوطى على صابره من قل تقديره
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار إحدى الزاوتين.