صوت الصورة

حافظ على الصقر يالنشمي
هذا رفيق المناعيري
واثنينكم زان بالرسمي
والوعد وقت المطاييري
والصيف قفّى مع الوسمي
وبان الشتا له تباشيري
والطير له بالسما قسمي
ومن الحبارى المخاميري
سعود عائش الحربي - القاهرة
اطلق سبوق الطير يابن الاجواد
الطير طلعه في مساه .. وصباحه
على حماد طريف ودويد من غاد
فكّه على الخربين يرفرف جناحه
حتى تقول الناس الطير صياد
وهذا هو الصقّار علم الصراحه
شجعان سعود العتيبي - الرياض
قرناس رافعْ له على الكف قرناس
هذا الولد صقّار يحب القرانيس
من بعد ما خذ له مع أبوه مرواس
ضرا على فعل الشرف.. والنواميس
يارث هواية والدٍ مالها اجناس
ويجنّبه فكر الردى .. والبرابيس
أحمد السمحان - الزلفي
الصقر له قيمه .. مكانه .. وتشريف
عند العجم والعُرْب ماضي .. وحاضر
صقرٍ نزل في عاليات المشاريف
الشِّعر سجلَه وصوف .. ومفاخر
يطرب له الصقّار لا جا على الكيف
يزهو فرح لاصار حايم .. وكاسر
عبداللطيف الحُمَيَّانِي - عنيزة
يعجبك شوف الحرّ وقت انطلاقه
لا شاف له خربٍ عزومه شغوفه
ولا شاف له تكريم وحسن العلاقه
من صاحبه يلقى الوفا .. والمروفه
خلّك معك يا صاح .. خل الحماقه
يحقق المطلوب باللي تشوفه
محمد عبدالعزيز الخنيفر - أشيقر
القنص وقته فات والطير مشتاق
عينه على شوف الحباري مشتاقه
على يد القناص يعزف بالأشواق
يصفق بجنحانه يبي له أنطلاقه
على الفضاء وملاعب الخرب توّاق
معاد له بجو البلادين طاقه
خالد ناصر المخيمر - روضة سدير
يا بو الشباب ارفق على هدّ طيرك
سبقه مكسر والذيل ريشه قصار
يا طير حظك اخلفك عن مسيرك
عقب الفضا تعلموا فيكم صغار
راح الذي يا طير أوّل يديرك
خلى الصقاره ماضيٍ فيه تذكار
سعود عبدالعزيز الهزاع - نعام
ياصغير ياملاعب القرناس
وشعاد لو صرت صقّار
القنص ولعه ولابه باس
خلّك على الرّزق دوّار
يكفيك ربي شرور النّاس
والله كريمٍ .. وغفّار
عبدالكريم عبدالرحمن السلوم - القرائن
الصورة اللي فالجريدة بها طير
حرٍّ على كف الصغيّر يرفي
أما طلوع الشمس وإلا مع عصير
نصف الشفق بيّن ونصف متخفي
من صوّره فنان في كل تصوير
تصوير ابن قبلان سعدي وشفي
سعود مطرب العتيبي - الدوادمي
عزّاه يا صقرٍ تواجد على الصيد
له مدّةٍ مبطي ولاجاب صيده
راعيه شبلٍ جالسٍ يجهل البيد
واللي شوا صقره ترى ما يفيده
اطلق سراحه يا ولد صيده بعيد
خلّه على فاله وحاله نكيده
حمد عبدالله الوايلي - حوطة سدير
هدّ الصقر واحذر ترى يبعد الحوم
ويصير مثل اللي بعادٍ هقاويه
الطير يكفح يا نديمي ولا يعوم
يقطع سبوقه لو عقدها مخاويه
كم واحدٍ يطلع ويقنص مع القوم
يترك عياله وأصله الصيد هاويه
يرجع منتف واسود الفال مشؤم
النفس شينه وابرق الريش شاويه
عبد الكريم النغيمشي - لوذة
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
صورة العدد السابق