صوت الصورة

هبّ البراد وجهزوله هل الصيد
الجيب والعزبه وطير الهدادي
نووا على الصمان في ثاني العيد
أهل الدروب المرمسات البعادي
عن زحمةٍ منها تشيب الأواليد
الصبح شمّو ريح نبت الحمادي
فهد بن عقيل الطويان - بريدة
كم مرةٍ يا طير عشيت ضيفان
وبيضت وجه معزبك بالسمينه
مخلبك يدخل في ثنادين ثمان
ومنقاركم عد القنص ذابحينه
وما كل طير له مخالب وجنحان
يجيب جزلات الفرايس يمينه
سعود بن عبدالعزيز الهزاع - نعام
الوقت زان والحباري تناديه
والطير محلا الطير محلا هداده
حرٍّ يصيد الخرب ويمزع ثناديه
أشقر مثبت صيدته في شداده
حمد عبدالله الوايلي - حوطة سدير
وقت الهدد قرّب ترى الطير مشتاق
يبي الفلا .. يبي الفجوج الوسيعه
يكفخ بجنحانه على الصدر والساق
يبي العشا والصيد عقب المجيعه
عبد المحسن بن محمد المحيسن - رياض الخبراء
ما طار طير وارتفع الا كما طار وقع
هالقاعده طبعاً تخص الرخوم من الطيور
لكن قليل اللي فهم من هالمثل أو اقتنع
ان الصقور الجارحه ما تلف و لا تدور
ما ينزل الحرّ الا بهداده ثم عوّد وارتفع
يسكن بروس الشامخات ولا يقرب من قبور
عبدالعزيز الدوسري - الشماسية
يا طير ياللي تفرس الطير بيديك
ما ترحم المسكين يا شرس الأفعال
غلطان تقتل واحدٍ ما يعاديك
يا ليت ما هي تنظرب فيك الأمثال
غرمان عبدالله المعيوف
هذا الصقر يا جاهلٍ في سواياه
يشفي غليل الكبد يجلب لك الصيد
ليمن كفخ فالجو يا طول مرماه
الله عطاه الشوف لو هو من بعيد
يا حظ من حطه رفيقٍ بيمناه
تلقاه فرحانٍ .. وشبعان .. وسعيد
عبدالله بن فهد الشريف - الدرعية
ولا يا صقر سرينني بشوفتك ذاليوم
طرحت الحباري مخلبك ما تعداها
على اسمك صقر يفداك طير الرخم والبوم
عساه أم خمس في الثنادي تغرشاها
وعزالله إنك مخلص وما عليكم لوم
طرحت الحباري وقلت ياعم دوك آها
مبارك محمد بن طرجم - وادي الدواسر
يا مرحبا يا الطير يا زاهي اللون
يا معجب الصقار من يوم هدّه
لا شاف زول الخرب صابه جنون
أحكم عليه بقبضته ثم شدّه
هو منوة اللي بالفيافي يقنصون
في وسط قاع من العشب مستمدّه
خالد بن ناصر المخيمر - روضة سدير
يا ليتني صقر شرد من صقاقير
ولاهم اللي بصيدته يخشرونه
ورأس مالي مخلبي ما عليّ ضير
سعر الدجاج يزود ويرخصونه
علي عبدالعزيز الصالح - حائل
صورةٍ ما هي بحاجة لتوضيح
جمال مع قوة لسيد الجو
يا صقر كم أسعدت ربعٍ مفاليح
لا هدّك القناص في مهماً دو
سعود عائش الحربي - القاهرة
البر زان وفرصةٍ للقوانيص
تجهزوا بيطوركم يالقنوصي
وخوة نشاما فالشدايد فواريص
الكل منهم دايم الطيب يوصي
واحرصك عن خوة الحرص تحريص
ما تصلح الجلسة وفيها حروصي
غنام مسعود القرشي - نعام
صورة العدد الرياض عام 1966م
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة