اللغز

كان كاتب اللغز الماضي الشاعر عايد خلف بن سطم بن رمال من الحدود الشمالية ويقول:
ويش البنات اللي لهن كل تقدير
بنات فعل وراسخاتن بالانساب
تنسب لهن كل الرجال المناعير
وهن بالنسب ترضخ لهن كل الاشناب
ان قلت نوره قلت يا أم الغنادير
وان قلت غيره قلت ياكثر من جاب
وقد توصل للحل شعرا
يامرحبا بك عد ما رفرف الطير
وعداد ما يمطر من المزن صباب
ما بين شخص وشخص به عزوةٍ غير
وكلٍ وله نخوه لها فعل وأسباب
احمد بن ناصر المحرج - الرياض
اهلا هلا باعداد ماغرد الطير
باللي حبك لغزه وينشر للاحباب
والحل صعب وفيه يالربع تفكير
هذي العزاوي بالوغى عند الاشناب
ناصر الهديرس - الرياض
يا مرحبا بك عد رمل المزابير
وعداد ما يكتب من حروف بكتاب
ترى العزاوي حلنا ما بها غير
هذا جواب اللغز مع كل ترحاب
علي رشيد الرشيد - رياض الخبراء
يا مرحبا ترحيبة تسبق الطير
باللي بنى لغز بترتيب وحساب
الحل واضح ما يبي زود تفكير
هذا عزاوي والعزاوي لها أسباب
محمد ابو دحيم - البدائع
لغز الاسبوع
يكتبه هذا الاسبوع الشاعر سعود عائش الحربي من القاهره ويقول:
ياويش رجل بالوطى حي مدفون
به قوة ولو بدا لك رقيقي
مع المشاكل عيشته ماهو ظنون
وسط البحر والبر وسط الطريقي
يقضى على قوته في فن وفنون
ولا يفرق بين ضد وصديقي
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة
وننوه بعدم المشاركة الازدواجية بين اللغز وصوت الصورة واختيار احدى الزاوتين.