بيت وصدى

كان بيت الأسبوع الماضي للشاعر إبراهيم بن راشد آل مغيرة من ضرماء ويقول:
صار الكذب ياناس للبعض عاده
يخلف مواعيده ويحلف بالأيمان
ومع شكرنا الجزيل للشعراء المشاركين ولكثرتهم فقد جزّأنا النشر على جزأين وكان صدى البيت من الشعراء:
كثير هرج ولا تحصل إفاده
ضاعة براهينه وللعهد خوان
غطى على عرقوب كذبً و زاده
ولا يكترث بالحلف وروياه بهتان
حي الرفيق اللي له الصدق عاده
لجل الصديق الصادق هو ذخر الأزمان
خالد عبدالله الصفيان - الرياض
الكذب مذمومٍ قوي سناده
ما ينتصدق لي كذب مرة انسان
توعد وتخلف وانت راعي عباده
آية منافق حرّمت بشرع الاديان
صدق الحديث يأهلك للسعاده
يوم الجوارح شاهدة وضمنها لسان
سعود عبدالعزيز الهزاع - نعام
أعوذ بالمعبود عن القراده
الناس ماتحلف على غير برهان
هذا الوكاد أن كان تبغى الأفاده
الكذب ماهو للأجاويد عنوان
واللي يحط الكذب ملحه وزاده
مايدري انه كل الأوقات خسران
دعسان غنام العنزي - القصيم
اقول يالمسكين وين السعاده
ضاعت حياتك بالكذب وقل الايمان
الصدق منجى ولا لك الا القراده
واعرف ترى فعلك مهانة ونقصان
ومن يزرع الخيرات يقطف حصاده
الوعد عهد وافهموا العلم يا أخوان
محمد عبدالعزيز الخنيفر- اشيقر
خلاصة للحكي هاك الإفاده
احفظ لسانك بالصدق طول الأزمان
تلقى بياض الوجه ماهو سواده
وتسعد بقلبً مابه هموم واحزان
ولاتامن اللي دوم حلفه زياده
يورد الكذبه ويصدرها بالأطنان
متعب عبدالله العويني - رويضة العرض
بعض العرب غاوي مشاكل نكاده
احمق وﻻ همه يجاهر بالاعلان
الكذب في طبعه وطبعه عناده
وانا اشهد انه ياهل الخير خسران
والصدق مطلوب وشرع وعباده
راعيه مايشقى وﻻ عنده احزان
حمد عبدالله الوايلي - حوطة سدير
الكذب مذموم بشرع العباده
مظلم طريقه راعي الكذب خسران
واليا مشى بالذم وش عاد فاده
الصدق مطلوب وساس وعنوان
امسك زمام الصدق تلقى السعاده
فرق كبير بين الاثنين شتان
عبدالمحسن المحيسن - رياض الخبراء
لا شفت فيه الكذب طبع وعاده
إبعد عنه .. رفقته نقص وخسران
واسلك طريق فيه تلقى السعاده
مع أهل صدق القول ذربين الأيمان
فالكذب مذموم وعيب إرتياده
منهي عنه فالدين بين أهل الإيمان
علي بن معاضه - الدمام
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر حمد عبدالله الوايلي من حوطة سدير ويقول:
الناس في الدنيا ضيوف وماشين
ومادبر الله للمخاليق صاير
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع
وموضوعه مفتوح للشعراء.