بيت وصدى

كان بيت الأسبوع الماضي للشاعر سعد صنهات السهلي من الدرعية بتنويه طريف عن وقت بياع الخبل عباته ويقول:
اليوم حر وقالوا البرد قد راح
البرد باقى يا مبيع عباته
وكان صدى البيت من الشعراء:
خذ العباه وكل الأوقات ترتاح
وخلك فطين ولاتسوي سواته
البرد باقي وبارق الصيف ملاح
ود الخبر لمحليلينه وهاته
وشيبان ببريده وبعضهم بالاسياح
بحسابهم يدرون بتقلاباته
دعسان غنام العنزي
فصل الشتاء محبوب والنفس ترتاح
وقت المطر والبر زاهي نباته
نبت الخزامى والنفل مسك فواح
كم واحد والبرد يخلف حياته
ظنه قضى والبرد مازال ياصاح
مثل الذي خبل وبيع عباته
عبد المحسن المحيسن - رياض الخبراء
احذر ترى برد الطويلين ذباح
كم واحد قبلك شكى من سواته
البرد ماخلى على ناس صحاح
اثر عليهم يوم طول مباته
وانا احمد الله كلن اليوم مرتاح
مغنيه ربي طارخ في غناته
حمد عبدالله الوايلي - حوطة سدير
خل التوقع وافهم العلم يا صاح
واللي يتهاون لا تسوي سواته
ترا الحذر مطلوب وهيء لك سلاح
والكل يبحث يا فتى عن حياته
واعرف ترا الدنيا تحتاج لكفاح
ولا كل علم قيل تصدق رواته
محمد عبدالعزيز الخنيفر - أشيقر
البرد شد وصاحي القوم مارتاح
متولم(ن) على ذلوله عباته
ومكيف الفريون نسمع له صياح
ومذن صلاة الفجر قدم صلاته
ياليت يالزعاق ترسلنا إيضاح
يفسرلنا الأحوال ومغيراته
شلاش بن بلال العنزي - الرياض
اركد وخلك بالمواقيت مرتاح..
واصبر الين البرد تقفي صفاته
ترى التعجل يا فتى الجود ذباح.
يقضي عليك وتاصلك سيئاته
برد الحميم اليا لفا منت نطاح.
لا تبعد الفروة تحمل قساته
علي رشيد الرشيد-رياض الخبراء
لا تأمن الاجواء ولوصرت مرتاح
مادام زرع البُر حي نباته
اسمع كلام اللي يحذر ونصاح
أعطاء مثال فاحفظوا له وصاته
يقلب عليك الجو والبرد ذباح
وراعي العباية لا تسوي سواته
عثمان ابراهيم الرشيد - الرياض
لا يغرّك اللي قالوا الناس يا صاح
وما يلدغ الموصي ليَااسْمِع وصاته
كل الفصول تتجيك.. رَيّح وترتاح
واخذ المشوره من فهيم بحياته
اسْلَم يا عبدالله ترى البَرد ذبّاح
واللي رمَى نفسه تحرّى وفاته
بندر إبراهيم الخنيفر - الرّياض
الصيف مقبل واقبلت معه الافراح
ولافيه شخص يغتني عن عباته
الا ليا حده من الوقت جراح
وجار الزمن فوقه ويبست لهاته
يرخص مثل عليا لابو زيد ياصاح
انباعت بحاجه وغنا كلماته
بدر الحزيمي
لاتخدعك هبوب نساس فواح
لسعات لليله هي ترا من صفاته
يوم الدفئ قد بان ونجمه لنا ..لاح
وقت الرياح المغبره من سواته
الله يغيث الخد بمزون مرواح
تنهي عجاجه لستشدة وطاته
خالد بن عبدالله بن حمد الصفيان - الرياض
بآخر فصل في البرد تدف وارتاح
بيّاع بشته نقوله لا شماتة
الصبح دافي وبآخر الليل يجتاح
بردٍ رياح مومرة شايلاته
تجيك موجة برد تسبب لك كحاح
ورجليه تمشّق من رمى كندراته
سعود بن عبدالعزيز الهزاع - نعام
أسلك طريق اللي به اليوم ترتاح
وعين الرجل يا صاح دايم مراته
فكر بدربك حين جيه ومرواح
ولا كل من يطلب يحقق مناته
يا سالك الإهمال كم واحد طاح
لا تطاوع اللي قال وتتبع صفاته
ريان محمد الخنيفر - الرياض
بيت الأسبوع
اقترحنا أن يكون موضوع البيت اختياريا للشعراء بطرح البيت وموضوعه وبيت هذا الأسبوع للشاعر إبراهيم بن راشد آل مغيرة من ضرماء ويقول:
صار الكذب ياناس للبعض عاده
يخلف مواعيده ويحلف بالأيمان
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011
ونرحب بطرح بيت الأسبوع
وموضوعه مفتوح للشعراء.