جزاك جنات النعيم

لو تنفع العبرة وكثر المناعي
وترجع الغايب على أهله يشوفون
كل بكا حتى فطيم الرضاعي
حتى سجين من وراء الباب مسجون
عليك يا فهد طويل الذراعي
ياللي بعد فرقاك كل قلب محزون
جزاك جنات النعيم الوساعي
أبشر بها كل المخاليق يدعون
ما فيه شعب ابه الاذاعة تذاعي
الا بجناته لفهد ينادون
حلال بين المسلمين النزاعي
كيف العرب ما بعد فرقاه يبكون
والله نبكي وامر ربي مطاعي
ويبكيه من له عقل وسموع وعيون
ويبكيه جيشه في جميع القطاعي
ونهل دمع العين والقلب مطعون
ويبكيه بدو فالفجاج الوساعي
ويبكيه حضر المملكة جمع وفنون
وطيبه تهل دموعها بندفاعي
ويبكيه بيت الله واللي يطوفون
ويبكيه شعبه يوم حان الوداعي
واللي يشاهد صورته في التلفزيون
كل بكا والصوت فيه انقطاعي
معاد تسمع علمهم وش يقولون
متبادلين الحزن والحزن شاعي
ناس نعزيهم وناس يعزون
الله يعوض بالحكيم الشجاعي
واخوانه اللي فوق ممشاه يمشون
عيال اخو نوره حكيم المساعي
عاشو وكل اولاد مقرن يعيشون
اسود تزيد الارتفاع ارتفاعي
ومدعمين المملكة عز وركون
في حكمهم لا خوف ولا نزاعي
الله ينصرهم على كل ملعون
ويالمملكة رفي بخضر الشراعي
فهد مخلفلك رجال يسدون
طيعي لعبد الله على الاتباعي
يا مرحبابه كل شعبه يحيون
اليوم راعينا وحياه راعي
متمسكن بالعون من راعي العون
الله يعينك يا وفي الطباعي
وتسلم يابو متعب وشعبك يعزون
ويعيش وال العهد رمز الدفاعي
سلطان سلطان السعد درع وحصون
ويالله ياللي دايم الدوم واعي
على جميع الخلق والعال والدون
تحفظ لنا آل سعود مرعي وراعي
أهل الكرم والجود في العسر والهون
وعلى طريق الحق والاستماعي
سمع وطاعة ثم عهد وقانون
وكل القبائل في جميع البقاعي
لا جا طلب حكامنا فيه يثنون
صلاة ربي عد مبدا اشعاعي
على رسول الله حق تصلون