مرحوم

هاذي نهاية رحلة العمر لو طال
مترين خام وحفرة القبر تأويه
إيودع الأقراب والأهل والمال
غير العمل ماله خوي يخاويه
لا والله ألا راح زيزوم الأثقال
أعزي أهل نجد وملوكها فيه
أواسي آل سعود أشاويس الأبطال
في خادم البيتين وانعاه وابكيه
لا وافهدنا حرزنا ردع من عال
لا غره الشيطان واعلن تحديه
مرحوم ياللي للصعيبات حلال
يا مزين اللي جاير الظيم حاديه
يا محبط خطة رديين الأفعال
كم واحد رديت راسه لرجليه
لعل ما قدمت من خير الأعمال
تلقاه في يوم تقدر حسانيه
يا الله يا منزل تبارك والأنفال
باسماك يا منجي إبراهيم تنجيه
اجعل له الفردوس مأوى ومنزال
وعلى الصراط أهده وثبت مواطيه
راضين حكم القدر في كل الأحوال
ما يكتب المولى على العبد يرضيه
رحل مليك وباقي ملوك ورجال
الكل منهم بالفعايل يحاليه
ميزاننا ثابت على الحق ما مال
والحكم تحت رعاية الله وراعيه
عبدالله اللي للثقيلات شيال
راضينه آل سعود والشعب راضيه
يبايعه شبان وكهول وأطفال
عسى السعادة والسعد في نواصيه
ولي عهده ساعده واف الأخصال
كل الخصال الطيبة من مباديه
سلطان سلطان السعد يبس الابلال
عوق الخصيم اللي ينفخ علابيه
سم على الأعدا وهم وسلال
وللشعب غيث ممحل القاع يحييه
وباقي هل العوجا لنا درع وظلال
رب ارحم اللي مات والحي تبقيه