بيت وصدى

كان البيت الماضي للشاعر عبيد عبدالله الرمال حول المبالغة في اسعار حملات الحج ويقول
ياللي نويتو يم مكه تحجون
عذرا ترى الحملات يرهق غلاها
وكان صدى هذا البيت من الشعراء
في كل عام والجماعه يزيدون
والناس تدفع يا عدي وش بلاها
هذا جنون هبال وأكثر من جنون
والمشكلة محدن يدور وراها
لو يتركوهم عام من شان يحدون
من قيمة الأسعار ترجع وراها
طلال بن غارم آل فرحان - الرياض
خامس ركن يا ناس تكفون تكفون
صارت مشقة كايده من عناها
روفوا بخلق الله موسر ومديون
ما تغني الأموال عمن حواها
قارون بلعته الأرض يايا مغالون
ثم غدى والمال في منتهاها
علي الزولاني الفيفي - بيشة
حجو على أية حال لا لا تبالون
لعل رب البيت ييسر علاها
خلو مروجت الدعاية ينامون
حتى يصحيها تروح أعملاها
يا منجين يونس من الحوت ذالنون
انك تعدل ميلها وابتلاها
بدر الحزيمي
يا ناقل الحجاج وللخير تسعون
أسعاركم تكفون محد(ن) رضاها
كم من ضعيّف يا جماعة يبي العون
وناس(ن) تحب الخير لا واهناها
كانك تريد الأجر فكر وبالهون
خلّ الضعوف اليوم تلقى مناها
محمد عبدالعزيز الخنيفر- أشيقر
وش حيلة اللي دايم الدوم مديون
ونفسه على الكعبه تسوقه خطاها
يرجي من اللي بأمره يدبر الكون
اللي بسط سبعا وسبعا بناها
ينهي معاناته على كيف مايكون
ويسهل الحجه على من بغاها
دلال نبات الشراري
شي يحز النفس والناس يدرون ..
هذي امور ماادري وش وراها
حملات حج اسعارها جنون بجنون
في كل عام دايره في رحاها
والناس مديونه ودايم يهرجون ..
ياليت حل للقضية سواها
علي رشيد الرشيد - رياض الخبراء
بعض العرب للحج مايستطيعون
ترى السبب معروف للي قراها
والحج حملاته ودايم يزيدون
فوق الخيال السعر عالي غلاها
الحل بالتخفيض ياللي تعرفون
كم حمله مايندرى من وراها
عبد المحسن بن محمد المحيسن - رياض الخبراء
لقيت في الحجاج ناس يقولون
حملاتنا هالوقت مرهق غلاها
وفي كل عام للدعايه يذيعون
عن المزايا والحلا في حلاها
وليا بغيت الحق والي يشوفون
مافيه شيء من دعايت تلاها
حمد عبدالله الوايلي - حوطة سدير
والحملة اللي ماتبي قرض وديون
مقرها من دون مكة تراها
تحتاج لك فزعات مع مدة العون
حتى تتمم حجتك واعساها
لو يعلن الحملة وبشعار مضمون
مالك ومال الكذبة اللي وراها
جارالله بن فراج آل فراج - الرياض
الاسعار تذبح في تزايد وف جنون
ومن كان مايقدر عليها بلاها
ومادامكم من مالك الملك ترجون
عفوه وغفرانه فصبرا (علاها )
وفي حفظ مولاكم تروحون وتجون
وذنوبكم ربي بفضله جلاها
مبروك بن سالم بن ماضي
شفنا الرقابة نايمة كيف يلهون
ناس(ن) تحط أسعار ولا أحدن نهاها
لازم تحط السعر موثق ومضمون
وكل(ن) يعرف اليوم وش محتواها
في كل مكتب تصدر أسعار تكفون
أسعاركم ما كل شخص(ن) قواها
ريان محمد الخنيفر - الرياض