صوت الصورة

تستاهل الفزعه.. وتستاهل الخير
حتى لو الجنحان صارت غطاها
ياما خذتك بحضنها دوم يا طير
وياما رويت الكبد من حلو ماها
عبد الكريم النغيمشي - لوذة
سبحانك اللهم يا رب سبحان
لك في جميع الأمر شان وحكمه
اسمك رحيم وأنت يا رب رحمن
وأيضاً جعلت بكل مخلوق رحمه
قدامنا المنظر وهو خير برهان
يغني النظر عن ألف كلمه.. وكلمه
طيرٍ يظلل طير .. والغيث هتان
عزالله إن الأم .. والأب نعمه
ناصر بن جمعان آل عوض - وادي الدواسر
على الشجر فوق الغصن في رفاعه
فارد جناحه لين ضلل صغيره
الطير ما حلى رحمته يا جماعه
ليت البنادم دوم موعض بغيره
حمد عبدالله الوايلي - حوطة سدير
هذا الحنان اللي نشوفه من الطير
خوفٍ من أمّه لا تبلله الأمطار
ذي وقفةٍ للأم خوفٍ من الغير
الأم لجل فراخها دوم تحتار
الأم معروفة لها دوم تقدير
وهذي مواعظ وافهموها يالاخيار
محمد عبدالعزيز الخنيفر – أشيقر
لا واهني الطير أبو ريش وجناح
لاما طرى له ضم ريشه وتلّه
وبلا تعب وقف على العود يرتاح
يأخذ نفس والدرب قد هو يدلّه
رزقه على الله دايم الدوم سواح
ومخليٍ هموم بقعا ورىً لّه
مبارك بن محمد بن طرجم - وادي الدواسر
تظللي يا أختي بظل الجناحي
وتطمّني دامك معي لا تخافين
ياما عانينا من هبوب الرياحي
وياما ذبحنا البرد والناس دافين
كم واحدٍ قبلك من القيظ ناحي
يسهر طوال الليل ما غمض العين
خالد بن ناصر المخيمر - روضة سدير
الطير فارش لجنحانه
يحمي فروخه من الأمطار
دبرتك يا رب سبحانه
العطف في صغار كبار
عبدالله بن عبود السهلي - تبوك
قليل ما ينشاف ذا الطير في نجد
مدري من طيور البحر أو مهاجر
بدوّره واشريه إن كان يوجد
وأصير شريطي ثم أبيعه لتاجر
سعود عبدالعزيز الهزاع - نعام
الله يا طيرٍ رفف بالجناحين
صقار وأصحابي عقولٍ رزينه
عسى الذي نزّل تبارك وياسين
يا قاك من عين الحسود المشينه
علي آل زولان الفيفي - بيشة
الطير.. وقت المطر رف الجناح
على خويه خوف .. زايد حنين
الودّ واجب فالمساء.. فالصباح
يا طير .. يا طير .. الله عوين
بشائر القحطاني - الرياض