اللغز

كان لغز الاسبوع من طرح معد زاوية اللغز عادي الشمري والذي يقول:
ياويش رجال سكن بطن رجال
واثنينهم في حضن بنت فتونه
واحد خذا من ساحل البحر موال
وواحد خذا من غبته بعض لونه
يظفي عليهم كلهم ستر واجلال
في وقت راحتهم ولاجل المصونه
وقد توصل للحل شعرا:
يامرحبا واعداد ماوادي سال
بابن رمال وبالصخا يذكرونه
واقول حل اللغز عقب اتعب الحال
النون والمينا بعين حنونه
احمد بن ناصر المحرج/الرياض
الف هلا يابو رجا الاموال
يابو رجا ياعل مالك مهونه
واللغز خذ حله بعد تعب الحال
العين والمينا وبنت تصونه
سعود الدهري/الرياض
يامرحبا باللي بنى اللغز بالحال
الشمري جابه وزانت لحونه
حنا نحل اللغز وإن طال وإن طال
سواد وسط الموق هم يذكرونه
وإلا بياض العين والدمع لاسال
بعض العرب ياصاحبي يكحلونه
عبدالمحسن بن محمد المحيسن/ رياض الخبراء
اهلا هلا واعداد ماوادي سال
بالغالي الي قام ينثر فنونه
عادي ولد شمر وبالشعر يختال
عبرالخزامى جاب احلا لحونه
وانابحل اللغز وان طال ماطال
هذاسواد العين وابيض بلونه
حمد عبدالله الوايلي/ حوطة سدير
يابو رجا حييت ياطيب الفال
ربعك رموز للكرم ينهجووونه
واللغز حله لاتدبرت الاحوال
اسود وابيض بالعيون الفتونه
علي الرشيد - رياض الخبراء
يابو رجا عندي لكم قدر واجلال
ذكرتني وقت مضى تذكرونه
تنشد عن الرجال في بطن رجال
اسود مع ابيض بالعيون الفتوونه
وجفون ستر العين والعشق قتال
وانا تركت العشق للي يبوونه
محمد ابو دحيم - البدائع
الشمري في لغزه الصعب وش قال
كنه يتحداء قال ماتقدرونه
قلناالعيون السودياطيب الفال
كم عاشقن منهن خفيه طعونه
سعد صنهات السهلي /الدرعيه
هات القلم واكتب لي الحل بالحال
وارسل جواب اللغز مالك مهونه
اللغز لابن رمال ياطيب الفال
ينشد عن اللي ساكنين عيونه
بياض عين ولابها شك وجدال
مع السواد اللي يداعب جفونه
فهد بن عقيل الطويان/بريده
لغز الاسبوع
ارسل للصفحة الشاعر محمد فرحان الفهيدي الحربي من القصيم هذا اللغز:
انا بنشدك عن رجل يغير كل يوم بلون
ولا يكبر ولا يصغر ودايم طايح سنه
الا منه تعين بالوظيفه حالة المسجون
يشوف الشمس وامطار السحايب مايبلنه
نستقبل الحلول على الفاكس 014871070
ويفضل الارسال عبر الايميل rb-khozama@alriyadh.com
ويسرنا المشاركة في طرح الالغاز