نايف على اسمه بالوفاء والشكاله

لا والله إلا ودّع الدار شغموم
سيف(ن) من سيوف الحكم والعداله
سيف(ن) يعز خشوم وينزل خشوم
من سلته الارهاب قطعت احباله
فيه العدل والرأي والنصح واللوم
لين الامن ظلل علينا ظلاله
هذاك نايف ينقض العلم بعلوم
نايف على اسمه بالوفاء والشكاله
نايف على حفظ الوطن شيّد رجوم
لين المواطن نام واستر فاله
واليوم يا نايف نقول لك مرحوم
والموت ما خلا نبي الرساله
يا الله ياللي بيدك الأمر محسوم
تغفر له الزلات تلطف بحاله
والعمر يفنى والليالي لها يوم
ولا دايم الا وجه رب الجلاله
والحكم ثابت والأمن فيه مرسوم
مثبت(ن) بالدين لآخر سلاله
في عهد أبو متعب عسى عمره يدوم
القايد اللي كلبونا رجاله
ولا غاب نجم(ن) بان مكانه نجوم
حكامنا لا صار فالعلم قاله
والله يعز الدين واللي له يقوم
وتحفظ لنا اللي شامخات(ن) جباله
تحفظ وطنا من بلاء كل مزعوم
ناس(ن) تحرم شي واضح حلاله
وما دبر الخالق على الخلق مقسوم
وما قدر الوالي على العبد جاء له
وصلاة ربي عد ما هلت غيوم
على النبي طه وصحبه وآله
د. ضويحي الروقي القحطاني