صوت الصورة

الدلّه الصفرا على طول الأيام
عند العرب تحفه .. ورمز الضيافه
تملى ببنٍ يقعد الراس لانام
في مجلسٍ من سيرته ما تعافه
عبدالمحسن محمد الجريسي – الرياض
رمز الضيافه دلةٍ هيلها فاح
أتصحي العمسان ليجا فطوره
عقب الصيام تخلي الراس يرتاح
وخصوص لاجت طيّبه.. ومحكوره
سعود عبدالعزيز الهزاع - النعام
يا حيّ هذا الشوف دلّه وفِنجال
وقرم ٍ يصبّه كيف والنار حيّه
في مجلس ٍ للضيف والجار مِدهال
ما دير به فنجال من زمزميّه
فهد بن عقيل الطويان - بريدة
يا مصلح الفنجال سلمت يمينك
ضبطة فنجالآ على الكيف محلاه
بدله الصفراء وعلى نظر عينك
ودغثت لها من هيل بالهند مجناه
فايز فرحان السويلم - فيضة بن سويلم
فنجال (صين) وينتظر دورة الصّب
من دلةٍ صفرا تسامر مع الهيل
مع ثعبةٍ كنّ الذهب منه يسكب
في رشفته زانت علوم الرجاجيل
سعد الحماد - روضة سدير
الى أذن المذن وبليت الارياق
والاجر مقبول لا جاكم العوق
صبوا لنا كيفٍ من البن قد فاق
مبهّر في دلال صفر لها ذوق
حمد بن عبدالله الوايلي - حوطة سدير
يا شايل الدله عسى النفس تفداك
تسوقها لأهل الوجيه الفليحه
ناسٍ تعلا طيبهم فوق الأفلاك
وبالجود والمعروف ماهي شحيحه
خالد بن ناصر المخيمر
يعجبني الفنجال لاصب بسلوب
ويعيجبني أكثر لاهتنيت بمذاقه
نفضل القهوة على كل مشروب
لا ذاقه العمسان زاده رواقه
سلطان سعد السهلي - المجتمعة
يا ما حلا الفنجال في وقت الافطار
ويزين شربه مع ربوع ورفاقه
بشهراً فضيل وحولك رجال اخيار
فيه الصفا وايضا حسين العلاقه
محمد بن عبدالعزيز النخنيفر
للعروبه ديرتي ساس الاجيال
ومنها الدلال الصفر بالشاذليه
بيمين نشمي للمناعير فنجال
للعرب عاده من الجاهليه
سعود عائش الحربي - جدة
يا ما حلا صبة الفنجال
من كيف صافي بلا مكيال
لا صرت في شهر الأعمال
عند الفطر رايق البال
عبدالكريم عبدالرحمن السلوم
قدم لنا يا بكر فنجال بني
انته من أهل الضيف وأهل الدلالي
أهل بيوتٍ بالكرم يعرفني
سلم العرب يا خوك ما ضي وحالي
بدر بن خلف الحزيمي
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070 زاوية (صوت الصورة)
ونرحب بالصور الهادفة والطريفة .. ويا هلا بالجميع
صورة العدد الماضي