اللغز

الأسبوع الماضي كان لغز الأسبوع من طرح الشاعر محمد بن صالح الأطرش من رياض الخبراء والذي يقول:
أنشدك عن بنتين في ورع صغير
وجودهن بالورع سبب له خطر
وان رحلن يرتاح من هم كبير
يلقى الأمان لو زاد عمره أو كبر
وحلول الشعراء:
يمحمد البنتين لو في جوف بير
عبر الخزامى ياصلك عنهن خبر
يشوفهن من شاف كان انه يدير
هاك الشريط اللي سبق سيدي ظهر
فهد بن عقيل الطويان - بريدة
يا مرحبا ترحيب من صاف الضمير
واللغز وارد ما يبا دفن وحفر
شيل البنات وخل ورعك يستدير
لا يخلفن علمه عليك وتنقهر
سالم البشري - الجبيل
يا مرحبا ترحيب من وجه سفير
لأصحابنا من غاب منهم من حضر
والحل فتحات الشريط اللي تصير
في قاعة الشرطان يا صلك الخبر
صلاح بن عبدالله اليابس - رحيمة
جبت الشريط ابسمع اعلوم(ن) كثير
اسمع علوم الخير واخبار المطر
وثر المسجل ما يسجل يالأمير
مشيوله البنتين ما يقبل خبر
محمد أبو دحيم - البدايع
يا ريحة خزامى لها ريح العبير
والغازكم دايم لها بطن وظهر
بنتين بالكاسيت والمكره تسير
هن يمنعن تسجيل لاجاهن كسر
عبدالرحمن العجلان - البكرية
هات الخبر لو كان عن سالم الزير
وموكد يا شيخ سطر على سطر
عبر الشريط مسجل كل تغير
وان شلتهن ما فيه تسجيل وخبر
عبدالمحسن بن محمد المحيسن - رياض الخبراء
يا مرحبا بك عد ما طير يطير
واعداد ما ينزل على الارض المطر
اللغز لا نكرت في حله يسير
فتحات بالكاسيت لاجاها كسر
علي رشيد الرشيد - رياض الخبراء
لغز الأسبوع
كتبه الشاعر أحمد المحرج من الرياض ويقول:
بنت وتفتحت باب يا ناس مقفول
يا كثر منهو يملك اليوم مفتاح
باب العدو تفتحه ما شيف له زول
فتح عيونك للعدو دوم يا صاح