اللغز

الأسبوع الماضي كان لغز الأسبوع من طرح الشاعر أحمد بن ناصر المحرج والذي يقول:
وشهن ثلاث يسكنن يا ولد بنت
الوانهن يا خوي عكس الغرانيق
ان هنتهن تاصل يسار أو تيامنت
ودايم يهانن من جميع المخاليق
افعالهن ما هي سوى لو تمعنت
عطني جوابك ما ابي منك تعليق
وقد توصل للحل شعراء..
اللغز في شطوره قريته تمعنت
ثلاث سوداً يا جماعة معاليق
فرامل وبنزين كالشت لاهنت
يدعس عليهن شغلهن يالمطاليق
مقرن بن متعب الهرف
من حل لغزك يابو ناصر تمكنت
والحل من الله صار وهبه وتوفيق
وهن تحت رجلين سايق ولاهنت
ثنتين للمشى وثالثتهن تعيق
محمد صالح الأطرش - رياض الخبراء
يوم قريت اللغز حقيقة امعنت
ثمن هداني الله منه التوافيق
يا أحمد جواب اللغز يجيك بالنت
يايميل اسرع من الطيور المخافيق
فرامل وابنص منهن تمكنت
وكلتش يريح القير عند التعاشيق
صالح إبراهيم السنيدي - الوشم
يا أحمد المحرج خذ الحل لاهنت
جاكم جميع ما أحب التفاريق
كلتش مع بنزين وايضا تفطنت
الفرمله معهن كمال التلاحيق
علي رشيد الرشيد - رياض الخبراء
اللغز عاد ومن جوابه تمكنت
هذا الكلتش وفرمله مع تلاحيق
ودواسة البنزين وتهان لاهنت
يا مدورين الصيد جتكم غرانيق
محمد أبو دحيم - البدائع
اربط فرامل وامسك بريك لاهنت
هن الثلاث بموترك خوش تنسيق
دعاسة البنزين واختين بينت
والثالثه بنت الكلش دون تحقيق
صلاح بن عبدالله اليابس - رحيمة
تسلم وهاك الحل ياخوي لاهنت
جتك الحلول من الرجال المطاليق
لغزك تراني منه يا احمد تمكنت
البنص والكلتش فيها تفاريق
وشفت الفرامل يمها عقب ماعلنت
جاك الجواب واترك اهل التعاليق
فهد العتيبي
سلام يابن ناصر على اللغز لاهنت
بصفحة الخزامى قريته بتوثيق
اليا ركبت الموتر ثم لهن عاينت
فرامل وكالشت وللقير تعشيق
ان صنتهن في رفق بالطرقة امنت
اعانك الله من خطات المطافيق
عبيد الله فالح الحربي - عنيزة
يا احمد اليا منك ركبت وتوازنت
دوس الابنص وسايق الرفق ذويق
وموترك اليا من حن ريحه لاهنت
رص الكتش وعشق القير تعشيق
وحذراك لا تسرع ترا بالهدو زنت
تلقا الفرامل طاوعت ساعة الضيق
ماجد بن عبدالعزيز الثميري - المجمعة
لغز الأسبوع
كتبه الشاعر محمد بن حويل العصيمي من الرياض ويقول:
أنا بنشد رجال العرف عن رجلين معروفين
ولا أقوى منهم الا اللي خلقهم والله الوالي
رجال يملكون ومن جليل الملك مملوكين
وترى للعلم تالي كان لاهل المعرفه تالي
نستقبل الحلول حتى مساء الاثنين القادم
على الفاكس (4871070)
أو الإيميل Rb-khozama@alriyadh.com
ونرحب بطرح لغز الأسبوع.