على فراقه ازعج الدمع همال

هذه الأبيات مرثية في الفقيد والدنا فياح بن هاجد العضياني رحمة الله عليه
عصر الخميس اربع عشر شهر شوال
فقدت عم من خيار الرياجيل
ركن مقره للمناعير مدهال
ديوان قصره مجمع للمشاكيل
راعي صيانن فوقها حيل وجمال
مبركات وسطها ثقال فالشيل
والعود الأزرق واحسن البن بدلال
والزعفران الزين ومخالطه هيل
تنفق يدينه كل مداته جزال
ينفق سخاء ماهوب منان وبخيل
شيخ برز فالدين مع طيب الافعال
أمضى حياته في صلاه وتهاليل
ياقل جنسه في كثيرين الازوال
ثابت وشامخ كنه الجدي وسهيل
في مجلسه ما تسمع القيل والقال
مبعد عن النمه وسقط الاقاويل
يا ما سعى بالصلح بانهاي الاشكال
بماله وجاهه ما يشح بمحاصيل
افعال عمي تتعب رجال ورجال
سيرة فخر تبقى لجيل بعد جيل
على فراقه ازعج الدمع همال
حرق جفون العين يسكب هماليل
عسى السحاب اللي مقاديمه ثقال
يسقي ثراء قبره ويرويه ويسيل
يا الله يا منزل تبارك والانفال
يا مدبر الارزاق فالصبح والليل
اغفر ذنوبه كلها دق وجلال
واكتب له الجنه وفكه من الويل
بصحبة نبي وضح الحق ما مال
دربه ومنهاجه بعيد عن الميل
عبدالله فيحان هاجد العضياني